Icele leMDC elizibiza ngokuthi yiRenewal Team lithi umlawuli wedale lephalamende uMnu. Jacob Mudenda kasoze enelise ukunquma kusicelo secele leMDC elikhokehlwa nguMnu. Morgan Tsvangirai esokuthi amalunga alelidale kanye lelesenate asekubandla leRenewal Team axotshwe kulelidale ngoba akhethwa ekubandla leMDC-T, esithi isizatho yikuthi uMnu. Mudenda wadlulisela udaba olufanayo kabili ukuthi luyehluzwa emthethwandaba.
Ekhuluma emhlanganweni lentathelizindaba eHarare ngoMvulo, unobhala jikelele weRenewal Team uMnu. Tendai Biti uthe kuyamangalisa ukuthi i-MDC-T ifuna amalunga alelidale akubandla lakhe angamatshumi amabili lanye axotshwe yona i-MDC-T isithi ayisoze iphatheke kukhetho.
UMnu. Biti uphinde wasola ibandla leMDC-T esithi lisebenzelana leleZANU PF ukuhlukuluza amalunga ebandla lakhe.
Kodwa isikhulumi seMDC-T uMnu. Obert Gutu uphikisile okukhulunywe nguMnu. Biti, wagcizelela ukuthi sokulomahluko kuloludaba olungabangela ukuthi umkhankaso wabo uphumelele.
Isiphathamandla seRenewal Team uMnu. Albert Mhlanga utshele uSithandekile Mhlanga weStudio 7 ukuthi kusobala ukuthi iMDC-T ithi ukumanyana kweRenewal Team lecele leMDC elikhokhelwa nguMnu. Welshman Ncube kutsho ukuthi sokubunjwe ibandla elitsha.
Kusenjalo ababeyiziphathamandla zebandla leZANU PF abasanda ukuxotshwa kulelibandla; uMnu. Didymus Mutasa loMnu. Themba Mliswa lamuhla bakhweze emthethwandaba udaba lokuxotshwa kwabo edale lephalamende ngeviki edluleyo.