Amalunga edale lephalamende amabili awebandla leMDC-T lokhanisila wedolobho lako Bulawayo abelezikhundla ezimqoka asexexebukile kulandela ukhetho lokudinga amalunga alelibandla phambilini komhlangano we congress esithi akulambuso okhululekileyo kulelibandla.
Laba ngababalisa obeqoqa inhlelo zalelibandla, uMnu. Albert Mhlanga, umgcinisihlalo wohlangothi lwabesifazane, uNkosikazi Gladys Mathe labanye. Omunye obethiwa uxexebukile ngomela iBinga, uMnu. Prince Madubeko Sibanda kodwa utshele iStudio Seven ukuthi lokhu akusiloqiniso ngoba yena elokhu eku MDC-T.
Ababili, uuMhlanga lo Mathe bamiswe phambili komhlangano lentathelizindaba besazisa ngokusuka kwabo kubandla leMDC-T.
Iphephandaba le The Southern Eye lithi kulamanye ama district ebandla angavunyelwanga ukuvota njalo leliphendaba lithi kube lokuqilibezela okukhulu okubangele ukuthi kube lenani lama voti eledlula abantu kade bemele bavote.
Omunye oxexebukileyo ngukhansila uNkosikazi Sheila Musonda.UMhlanga ubsesanda khethwa okwesibili ukuba ngusiba lukhulu obona ngokuqoqwa kwenhlelo zebandla kodwa wakhalala.
Okucunule abanengi yikuthi kukhethwe uMnu. Gift Banda ukuthi abengumgcinisihlalo khona kulemibuzo yokuthi kala sikhathi eside elilunga lebandla.
Abanye bathi uTsvnagirai ngokwakhe nguye kade evotisa abantu. Kubikwa njalo kuqhamuke udlakela ekhetheni lolu kodwa asenelisanga ukuzwa ukuthi kulabantu abalimeleyo kumbe ukubotshwa.
Kubikwa kuwiswe intuba ye Stanley Square. UChris Gande weStudio Seven uxoxe lomsekeli kanobhala obona ngokuqoqwa kwenhlelo zebandla le MDC-T Renewal Team koBulawayo, uMnu. Edwini Ndlovu ukuze sizwe ngalabo abaxexebuke kubandla leMDC-T.
Kunjalo nje, uChris uphinde waxoxa lomsekeli kanobhala obona ngokuqoqwa kwenhlelo ze MDC-T, uMnu. Abednico Bhebhe othi ngamanga ukuthi uMnu. Tsvangirai wayevotisa.
UBhebhe utshele uChris Gande weStudio Seven ukuthi akubanga lomsindo eStanley Square kodwa kulabantu abalihlekana nje kuphela wengezelela esithi abangqotshwe kukhetho bafuna nje ukugcona ibandla.