Udaba olwethulwe edale lephalamende lokuthi umphthintambo wezempilakahle, uMnu. David Parirenyatwa kumele amiswe phambi kwekhomidi yezempilakahle selumanyanise amalunga alelidale athi mpela kumele azechasisa.
UParirenyatwa wetheswa icala lokwamukela inkulungwane phose ezilikhulu zamadollar eyayivela kunkampani yezemilakahle eye PSMAS yona ephakathi kodubo lokusilela kwemali izisebenzi zihlala inyanga ezintathu zingela holo njalo abadinga ukuya kwelatshwa beswela uncedo lwalinhlanganiso ngoba ingasabhadali.
Amalunga ebandla leZanu PF athi, uMnu. Joseph Chinotimba loMnu. Fortune Chasi avumelane lalindaba ethulwe nguMnu. Eddie Cross owebandla le MDC-T ukuthi kumele uParirenyatwa azochasisa ngalimali avumayo ukuthi wayemukela.
"Leli lithuba lokutshengisa ilizwe jikelele lozulu ukuthi idale lephalamende lilakho ukujezisa abangathembekiyo" kutsho uChinotimba.
Omunye njalo olilunga lebandla le Zanu PF osekele ukulethwa edale kukaMnu. Parirenyatwa nguMnu. Munyaradzi Kereke.
Ukuhlaziya loludaba sixoxe lengcwethi ecubungula ezombusazwe loMnu. Anglistone Sibanda endawonye loMnu. Prince Dubeko Sibanda, olilunga lekhomidi yezempilakahle, efuna ukuthi uParirenyatwa aze kuyo. UDubeko Sibanda nguye osungula lingxoxo.
"Kuqakathekile ukuthi sinanzelele ukuthi akulasiphathamandla sebandla leZanu PF esesike saxotshwa ngenxa yodaba olufana lalolu," kutsho uSibanda.
