Ukuhlohla edlala engekho ekhaya kuwasebenzele amaqembu amela ilizwe emdlalweni kanobhutshuzwayo abephatheke kumidlalo yokudinga amaqembu azakuyadlala kumidlalo yama Olympics kanye leye African Youth Championships.
Iqembu elimela ilizwe kucele labesifazane ele Mighty Warriors linqobe ele Zambia nge 1 ka nya ngeSonto esigodlweni iHarare.
Lokhu kutsho ukuba nxa sekuhlanganiswa lempumela yomdlalo wehlandla lakuqala lapho iZambia enqobe khona nge 2 ka 1 khonale eZambia iqembu le Zimbabwe linqobe nge 3 ka 2 ngoba umklomelo walo eliwuhlohle eZambia ubalwa kabili.
Iqembu lama Mighty Warriors lizadlala leqembu le Ivory Coast kusigaba esilandelayo.
Kusenjalo Iqembu lamajaha aleminyaka engaphansi kwamatshumi amabili lantathu lona libe ngutshiki lobhanqa 2 ka 2 leqembu labosowabo ele Swaziland khonale eSwazini.
Lokhu kutsho ukuba lalo lidlulele kusigaba esilandelayo esomncintiswano we African Youth Championships qualifiers ngoba imiklomelo le eliyihlohle khonale ibalwa kabili.
Umdlalo wehlandla lakuqala uphele zingutshiki lobhanqa kungela qembu elenelise ukulitshayela emambuleni.
Iqembu le Zimbabwe lizadlala lele South Africa kusigaba esilandelayo njalo singesokucina esokudinga amaqembu azadlala ku mncintiswano ozakuba elizweni le Senegal ekupheleni komnyaka.
.......................................
Kolunye udaba olumayelana lomdlalo wenguqu iqembu le Chicken Inn selikhokhela ngemiklomelo emine phezu kwengalane yesigaba se Premier Soccer League lilemiklomelo engamatshumi amabili lesithupha ngemva kokunqoba ele Buffaloes nge 3 ka nya ngoMgqibelo.
Ngemva kwalo kuleqembu le Dynamos elilemiklomelo engamatshumi amabili lambili ngemva kokuba ngutshiki lobhanqa 1 ka 1 leqembu le Triangle lona elikundawo yesithathu lilemiklomelo engamatshumi amabili lanye okulinani elilingana lelileqembu le How Mine lele Chapungu.
Kundawo yesithupha kuhlezi iqembu le Caps United lona elilemiklomelo eyithoba munwe munye ngemva kwalo kuleqembu le Highlanders elilemiklomelo engamatshumi ayithoba minwe mbili.
Iqembu le FC Platinum likundawo yethoba minwe mbili lilemiklomelo elitshumi lesikhombisa okulinani elilingana leleqembu le Harare City.
Kundawo yetshumi kuleqembu le ZPC Kariba elilemiklomelo elitshumi lane lona lilandelwa liqembu le Hwange elilemiklomelo elitshumi lantathu.
Iqembu le Buffaloes lihlezi kundawo yetshumi lambili lilemiklomelo elitshumi lambili ngaphansi kwalo kuleqembu le Whawha elilemiklomelo elitshumi lanye.
Kundawo yesithathu usuka phansi kwengalane kuleqembu le Tsholotsho elilemiklomelo elitshumi.
Iqembu le Tsholotsho linqotshwe nge 2 ka nya ngele Caps United njalo umqeqetshi walo uLizwe Sweswe uthi ukungabi lenkundla yabo kuyabaphazamisa kakhulu.
Ngaphansi kwalo kuleqembu le Flame Lily elilemiklomelo eyithoba minwe mbili kuthi iqembu elijeke amanye wonke ngele Dongo Sawmills lona elilemiklomelo eyisikhombisa njalo elinqobe okwakuqala lokhe lingene kusigaba saphezulu lapho litshaya ele Flame Lily nge 2 ka 1.
...................................................
Sikhangele umdlalo kakhilikithi; iqembu elimela ilizwe emdlalweni kakhilikithi linqotshwe nge 2 ka nya ngele Pakistan kumidlalo yohlobo lwe One Day International ebidlalelwa khonale ePakistan ensukwini ezedluleyo.
Iqembu le Zimbabwe linqotshwe ngama runs angamatshumi amane lanye emdlalweni wakuqala obekhona mhla zingamatshumi amabili lesithupha kunyanga kaNkwenkwezi laphinda ladliwa ngama wickets ayisithupha emdlalweni wesibili mhla zingamatshumi amabili lathoba munwe munye ikanti umdlalo wesithathu obukhona ngeSonto edluleyo awusabanga lempumela ngemva kokuphazamiswa lizulu.