Umpathintambo wendaba zasekhaya kwele South Africa umnumzana Malusi Gigaba uthi ugatsha lwakhe solulungele ukusungula uhlelo lokubhalisa abadabuka eZimbabwe ingwalo zokuhlala lokusebenza kulelo lizwe.
Ekhuluma emhlanganweni lentathelizindaba ePretoria, ngoLwesine uGigaba, uthe ele South Africa isizaqalisa ukuthatha amaform alabo asebefuna ukuvuselela inhlalo yabo elizweni lelo abaphiwa ingwalo lezi ngomnyaka ka2009 eziphela ukusebenza ekupheleni kwalonyaka.
Uqhubeke ethi kulendawo ezingaba litshumi zokuyafaka amafomu lawa njalo kulezisebenzi ezingaba likhulu lamatshumi amabili asebelungele ukuqhuba lumsebenzi ekuqaleni kwenyanga ezayo kaMfumfu.
Kodwake izizalwane zeZimbabwe zizamele ziqhale ngokubhalisa ebulenjini andubana zibizwe ukuzofaka amafomu azo kanye lokupha ubufakazi bokusekela ukuthi kungani bedinga lawo mapermit.
Ukuze abeZimbabwe benelise ukubhalisa kuzamele bahlawule amaRand phose angamakhulu athoba munwemunye-R870 okuyimali ehlawulwa ukuthola amapermits kugatsha lwakhe ngabakwamanye amazwe.
Umpathintambo lo uthi njalo bayakwazi ukuthi kungaba lenkinga ekuqhaleni ukubhalisa ebulenjini kodwa uthi njengo hulumende bazabona ukuthi umuntu wonke uyafinyelela i-internet. Uthi bazaqhubeka besebenzelana lenhlanganiso zabamela abeZimbabwe kwele South Africa kulolu daba.