Kulandela isinqumo esithethwe nguhulumende we South Africa ukuthi aphe izizalwane zeZimbabwe incwadi zokuhlala, ukufunda, kanye lokusebenza kulelolizwe ngokusemthethweni, inengi lithi liyadana ngokuthi incwadi lezi azivumeli ukunika imuli zabo ezasala ekhaya amalungelo afanayo.
Inhlanganiso ezilwela amalungelo oluntu eSouth Africa bezikhankasela ukuthi incwadi lezi zigoqele omkabo balabo abalazo kanye labantwababo, kodwa umphathintambo obona ngezenzakala kulelolizwe uMnu. Malusi Gigaba usanda ukuchasisa ukuthi lokhu akukho emthethweni welizwe lakhe.
Kusenjalo, uMnu. Ngqabutho Mabhena, umgcinisihlalo wenhlanganiso elwela amalungelo oluntu eye Zimbabwe Community in South Africa uthi inhlanganiso yakhe iphakathi kokuqoqa umhlangano lohulumende we South Africa ukuthi azichasisele ngohlupho olubhekane lezizalwane zeZimbabwe ezizama ukuthola incwadi zokuyasebenza kulelolizwe zisuka kwele Zimbabwe.
