Amapholisa kaManisipala wedolobho leHarare abikwa edilize imikambo yabathengisa ezitaladeni abanye babo babotshwa ekuqhubekeni kohlelo lokuxotsha abantu laba ezitaladeni zeHarare.
Abenhlanganiso yabaphila ngokuthengisa ezithaladini abe National Vendors Union Zimbabwe bathi bafuna ukusa umanisipala weHarare emthethwandaba, bemethesa umlandu wokusebenzisa udlakela ukubasusa ezitaladeni.
Kodwa umanisipala uyakulandula lokho ethi amapholisa akhe akazange asebenzise dlakela abakwenzayo yikususa laba bantu ezitaladeni ukuze baye endaweni ezilungiselwe lumsebenzi, hatshi ukuthi bagcwale ndawana yonke
Lokhu kuvezwe ngophethe uhlangothi olubona ngezokuqhutshwa kwemisebenzi enhlanganisweni ye NAVUZ le, unkosazana Lucy Makunde, emhlanganweni lentathelizindaba ngemva kokubhidlizwa kwenye indawo ebithengiselwa impahla phakathi kwedolobho leHarare.
Unkosazana Makunde uveze ukuba bakubone kufanele njengenhlanganiso, ukulukhweza emthethwandaba loludaba ngemva kokunanzelela ukuba usesebenzisa udlakela, umanisipala ekubasuseni lapho abakhona.
Umnumzana Benard Ncube ngomunye wabaphila ngokuthengisa, esebenzela lapho kuhlangana khona imigwaqo uJulius Nyerere lo Jason Moyo. Ubekhanya ephelelwe uNcube, ngemva kokufica ebhidliziwe indawo akade esebenzela khona lamuhla ekuseni.
Wengeza uNcube ethi uvumelana lombono weNAVUZ, wokusa umanisipala emthethwandaba phezu kokuhlukuluzwa kwabo.
Umqondisi wenye yenhlanganiso yabamela abathengisa ezitaladeni laba, eye Zimbabwe Informal Sectors Organisation – ZISO,umnumzana Promise Mkhwananzi, usole kakhulu ukwenza kwamapholisa kamanisipala la.
Kodwa isikhulumeli sikamanisipala umnumzana Michael Chideme uzilandule izehlakalo zodlakela ethi ngoba amapholisa kamanisipala engavunyelwa ukukwenze lokho.
Wengeza uChideme ethi okwenziwa ngamapholisa kamanisipala, yikubhidliza lokususa uzulu ophila ngokuthengisa, endaweni, eziphakathi kwedolobha, ukuze bayesebenzela kulezo ezisemthethweni.
Uthi abaphila ngokuthengisa laba, baphiwa isikhathi eside sokukwenza lokho kungakho akumelalanga kube yinto emangalisayo ukuba sebebhidlizelwa lezo akade besebenzela kizo phakathi kwedolobha.
Lamuhla emadabukakusa, amapholisa kamanisipala, abhidlize indawo lapho bekuthengiselwa khona imaphahla eyehlukeneyo, lapho kuhlangana khona umgwaqo u Julius Nyerere lo Jason Moyo.
AbeNAVUZ bathi kunje bakhona abalinyaziweyo ngemva kokutshaywa yilamapholisa, bekhona ababotshiweyo njalo besetheswa umlandu wokwala ukusuka endaweni abekade bethengisela kizo edolobheni, okuyinto elandulwa ngumanisipala.
Intathelizindaba yethu uMavis Gama usethulela loludaba ngokugcweleyo.
Ukuhlaziya loludaba uChris Gande westudio seven uxoxe lokhansila wedololobho leHarare, uMnu. Peter Moyo olilunga leMDC-T endawonye loMnu. Joshua Mhambi isikhulumeli seMDC ekhokhelwa ngumnu. Welshman Ncube onguye osungula lingxoxo.