amalinks wokungena

Breaking News

Amaqembu Kazulu Awenguqu eDete Adinga Uncedo Lwemali


Inkokheli zeqembu lenguqu likazulu wemaphandleni ase Dete eHwange sezazise ukuthi zidinga uncedo lwamankampani labalifisela kuhle lwezicathulo zebhola, amabhola kanye lokunye okidingakala ekufundiseni abafana umdlalo wenguqu kanye losekelo olufana lokupha abadlali balo amathuba okudlalela kumaqembu adlala kuzinga eliphezulu le Premier Soccer League.

Ilanga langesonto alifani lamanye esigabeni se Dete ngoba kulapho amaqembu omdlalo wenguqu angaba phose angamatshumi amathathu abuthana kuzinkundla ezitshiyeneyo edlala uqhubeka umcintiswano wokufuna ukubona ukuthi ngubani ozakuba ngumaqhuzu kuligi ye Dete lonyaka.

Lanxa kuyikunqoba nje okungelankezo loba imali, abadlali bamaqembu kazulu enguqu badlala engathi kukhona izinkulungwane abangaphuma lazo nxa umdlalo uphela. Kodwa abalapha abadlali bekhangele ukunqoba kuphela. Ibhola liyingxenye yempilo yabantu ngendlela eyenza ukuthi uzulu athole ukusuthiseka okunengi ngokubukela umdlalo ukwedlula injabulo yokunqoba kumidlalo elezimali ezinkulu.

Phakathi kwamaqembu adlala kuligi yokuzibumbela eye Dete, kukhona iShumba Stars eyabunjwa ngo 1997 njalo eseyakhupha abadlali ababili abadlalela amaqembu akuzinga eliphezulu le Premier League.

Umqondisi wayo umnumzana Shamiso Tshuma uthi leli liqembu eliphezulu okwamanje kuligi ye Dete njalo lilabadlali abaphiweyo ezinyaweni. Uthi selike langena ku Division Two okweminyaka kodwa lakhutshwa yikuthi kwakumele lisebenzise izimali zalo ukuhambela imidlalo kanye lokugcina abadlali ngesikhathi besemsebenzini webhola.

UTshuma uthi okwamanje iqembu lakhe likhangelele ukunqoba njalo lihlale liphezulu kweligi ye Dete. Ulichaze njengeqembu elilosekelo olukhulu lukazulu othanda ibhola okwamagama njalo okholisa ukubukela abantwabakhe bewudlala lumdlalo. Uchaza ukuthi imphathisa ngani uzulu we Dete i Shumba Stars.

Umqeqetshi weqembu umnumzana George Khumalo owake wadlalela iqembu le Tanganda FC ngensuku zakhe uthi uyajabula kakhulu ukuhola iqembu elilabadlali abalesiphiwo kodwa uthi kunengi okwenza imizamo yokuthuthukisa umdlalo webhola emaphandleni kube ngumsebenzi onzima kakhulu.

Uqhubeke esithi akathandabuzi ukuthi i Shumba Stars ingaphumelela ize iyengena ku Premier League uma ingathola usekelo ngoba ilabo abadlali abalesiphiwo.

Umnu Tshuma ugcizelele kulokhu esithi imizamo yokuthuthukisa umdlalo wenguqu isiphelelele emoyeni ngenxa yokuthi akusela mankampani asekela inhlelo eziqondene lokuthatha abafana abalesiphiwo sebhola abafihlakale emaphandleni ukuze babonwe ngamaqembu amakhulu. Kodwa uthi lawo amaqembu amakhulu alomlandu wokuhambela imidlalo yamaqembu amancane asemaphandleni ukuze avumbulule intshantshu zebhola ezifihlakeleyo okwamanje.

Okwakhathesi, i Shumba Stars lamanye angaphezu kwetshumi lanhlanu athola usizo lwezigqoko kanye lamabhola oluvela kunhlanganiso evikela amaganyana aseHwange National Park i Wild Dog Trust njengendlela yokukhulisa umdlalo.

XS
SM
MD
LG