amalinks wokungena

Breaking News

Usufike KumaSemi-finals Umncintiswano Wenguqu oweAFCON


Afcon logo
Afcon logo

Sekusele amaqembu amane kumncintiswano wokudinga intshantshu zezwekazi lase Africa oqhutshelwa elizweni lase Equatorial Guinea okutsho ukuba limidlalo isifike kusigaba sama semi-finals.

NgoLwesithathu iqembu le Ivory Coast lizadibana lele Democratic Republic of Congo ku semi-final yakuqala njalo iqembu elizanqoba lapho lizahlangana lelizaphumelela phakathi kweqembu elimela ilizwe eliqoqe limidlalo yeAfcon ele Equatorial Guinea lele Ghana wona azadlala ngoLwesine.

Iqembu le Equatorial Guinea linqobe ele Tunisia nge 2 ka 1 emdlalweni wesigaba se quarter-final kodwa indlela elinqobe ngayo itshiye abanengi besola ukuba kukhona okutshaya amanzi ngoba liphiwe umbekwa wamahala umdlalo ususiyafika komlindi uyacina ele Tunisia likhokhela nge 1 ka nya.

Kuthe ngemva kokungezelelwa kwesikhathi iqembu lasekhaya lithole umklomelo wesibili umdlalo waphela unjalo lahle ladlulela kusigaba esilandelayo kodwa limpumela idale ingxabangxoza ngoba unompembe ebaleke ngesiqubu exotshaniswa ngabadlali be Tunisia kwaphinda kwaba lokulwisana phakathi kwabadlali bamaqembu womabili.

Amaqembu azadliwa kumidlalo yesigaba se semi-final azangqikilana ngoMgqibelo sokudingwa iqembu elizaqeda likundawo yesithathu kuthi ifinal izakuba khona ngeNsonto.

**************************

Sikhangele umdlalo wenguqu elizweni laseNgilandi lapho amaqembu ahamba phambili kumidlalo yalonyaka athi ele Chelsea kanye lele Manchester City ebe ngutshiki lobhanqa 1 – 1 ngempelaviki edluleyo.

Limpumela itshiye ele Chelsea lilokhu lithe kho phezu kwengalane yemiklomelo lilemiklomelo engamatshumi amahlanu lantathu (53) kuthi iqembu le Man City lisendaweni yesibili lilemiklomelo engamatshumi amane lathoba minwe mbili (48).

Umbango wokuba yingxenya yamaqembu azaphatheka kumncintiswano we UEFA Champions League uphakathi kwamaqembu athi ele Manchester United elikundawo yesithathu engalaneni lilemiklomelo engamatshumi amane lantathu kuthi ngaphansi kwalo kulamaqembu athi ele Southampton kanye lele Arsenal wona alemiklomelo engamatshumi amane lambili.

************************

Siphenduke kwele Zimbabwe lapho owake waba ngudokotela weqembu le Highlanders waphinda njalo waba ngumeneja waleliqembu uEmmett Ndlovu esebuyele njalo ukuba yingxenye yenkokheli yaleliqembu ngemva kokukhethwa njengonobhala jikelele omutsha weqembu le Bosso.

UNdlovu uthe ngemva kokunqoba akwenze labo akade encintisana labo abathi uInnocent Batsani Ncube, uNjabulo Bango, uPilate Mahlangu kanye lo Donald Ndebele wathembisa ukuba yena uzasebenzela iqembu ukwenzela ukuba lale lilokhu likhona kuze kube naphakade.

Othethe isikhundla selunga lekhomithi nguWisdom Mabhena oke wasiphatha lesisikhundla eminyakeni eyadlulayo njalo yena uthe umsebenzi obhekane laye ngowokuqeda ubudlwangudlwangu kubalandeli beqembu.

XS
SM
MD
LG