Izakhamizi zakoBulawayo zithi kuqakathekile ukuthi lapho umhlaba unanza iWorld Habitat Day ngaliviki, ikhansili kanye lengatsha zikahulumende zifunde ukuqakathekisa amalungelo abantu ukuze babelakho ukuba lesiqiniseko sendawo abahlezi kuzo njalo bathole ingwalo zama title deeds hatshi ukuhlaliswa nje besesaba ukuthi balakho ukususwa yiloba yisiphi isikhathi.
Izakhamizi zemizini ehlala abanengi edolobheni lakoBulawayo ziyasola kakhulu ukwehluleka kwekhansili ukuzipha izindlu abahlala kuzo kanye lokungaphi uzulu indawo eyaneleyo yokwakhela zisithi yikho okuletha ukungathembeki kuzisebenzi kanye lokufumbathisana ukuze izakhamizi zithole izindlu zokuhlala loba izithanda zokwakhela.
Insolo le iza kulandela ukuxabana okube khona phakathi kwezakhamizi ezihlala ezindlini zekhansili eIminyela ebezisithi inhlanganiso yezakhamizi iBulawayo Progressive Residents Association iyazethusela ukuthi zizasuswa kulezizindlu nxa zingabhalisanga ukuba ngamalunga alinhlanganiso. Izakhamizi zalapha kanye leMakokoba, le Emganwini zihlala ezindlini lapho ezingela ncwadi zama title deeds kodwa ziqhubeka zibhadala imali kukhansili nyanga zonke.
Inhlanganiso ye BPRA ithi akusiqiniso ukuthi iyethusela izakhamizi kodwa idinga ukuthi ikhansili iphe abantu izindlu ezibiza bona hatshi eziqhubeka zibizwa ngomanisipala.
UNkosikazi Julie Moyo, uthi ukubhadalisa izakhamizi ezikulezizindlu impilo yazo yonke kungela ma title deeds akuqedi udubo lokuswelakala kwezindlu kulelidolobho njalo ikhansili akumelanga isebenzise imali evela kwamanye amazwe ukuzithuthukisa yona kodwa ukuguqula impilo yezakhamizi lezi esinye ezavela endaweni ye Sidojiwe Flats. Uthi ikhansili lohulumende kumele yenze imizamo yokupha lezizakhamizi izindlu ezibiza bona ngoba besebenza nzima ukubuthelela imali yokubhadalela indawo yokwakha lapho bethe bayinikwa.
UNkosikazi Emma Dlamini ohlala eNgozi Mine uthi kunanzwa iWorld Habitat Day kumele kwaziwe ukuthi wonke umuntu ulelungelo lokuhlala endaweni ehlanzekileyo, engamsusi isithunzi imenze inhlekisa emphakathini. Uqhubeke esithi babhekane lobandlululo kuzulu ngenxa yendlela abahlala ngayo njalo lezisebenzi zekhansili zihlezi zibabhadalisa ensitha kodwa nxa sokuphuma uluhlu lwalabo abayathola indawo zokwakhela izindlu batshiywe ngaphandle.
UMnumzana Siphatho Ncube, isakhamuzi, uthi ikhansili kumele idinge amanye amasu kanye lezimali ezivela kwamanye amazwe ukwakhela uzulu izindlu. Uthi ikhansili ingazimisela ukwakha izindlu kuzavuselela lomnotho welizwe ngokupha abantu imisebenzi.
Okwakhathesi izakhamizi zeIminyela, eMakokoba, eSidojiwe Flats kanye le Emgnwini Millenium Housing Project zihlala ezindlini lapho ezingela ncwadi zama title deeds kodwa ziqhubeka zibhadala imali kukhansili nyanga zonke. Inhlanganiso ezizimele zodwa zithi uhulumende angeke acatshe ngemali nxa ezimisele ukuthuthukisa indawo uzulu ahlala kuzo ngoba zinengi inhlanganiso lamazwe azimisele ukuphathisa nxa umsebenzi uphathwa ngendlela njalo kunanzwa amalungelo oluntu.