Izakhamizi zedolobho leHarare zithi kazimangaliswa yinkulumo yenkokheli ye Zanu Pf phezu kokuba bakhona kulelibandla abakhankasela ukuguqulwa kwenkokheli yebandla ethi bekuvele kukhona kodwa kungaphumeli egcekeni lanxa eminyakeni yangemuva bekuyinkulumo ebiqondiswe kwabebandla eliphikisayo ele Movement for Democratic Change elikhokhelwa ngumnumzana Morgan Tsvangirayi.
Emazwini akhe atholwe zintathelizindaba ngoMvulo, uthe bakhona abakhankasela ukuguqulwa kwenkokheli ebandleni le Zanu Pf. Isikhulumeli salelibandla umnumzana Rugare Gumbo uveze ukuba bakhona ngempela ebandleni lakhe asebephatheke kumisebenzi yokufuna ukuguqula inkokheli okubaliusa umongameli Robert Mugabe.
Usole ukwenza kwalaba bantu ethi abenza lokho kuyibo njalo abenza ingani bayamthanda uMugabe njengomkhokheli webandla bona belenjongo yangasese.
Kodwa uzulu eHarare uthi akungamangalisa okukhulunywa nguGumbo ngoba bekuvele kuyimicabango esobala kunkokheli yalelibandla lanxa bekungaphumeli egcekeni njengalokho osekusenziwa khathesi ngoba be isesaba.
Umnumzana Thomas Dube ungomunye wezakhamizi ze Harare okhulumisane le Studio Seven wanikeza umbono wakhe phezu kwaloludaba. Uthi uDube lokho osekusenzakala ebandleni leZanu Pf yisibonelo sokuba inkokheli isikubona ukuqakatheka kokuvumela ukuguqulwa kwenkokheli ngoba umumo ungemuhle okwamanje elizweni.
Lokhu kusekelwe ngumnumzana Jabulani Mkhwananzi laye oyisakhamuzi seHarare.
Eminyakeni yangemuva, ibandla le Zanu Pf yilo ebelitshumayela ivangeli lokuthi izitha zikamongameli Mugabe ngabebandla le MDC elikhokhelwa nguTsvangirai ngoba beqhuba imikhankaso yokuguqula inkokheli yeZanu Pf kusetshenziswa indlela yokugenqula umongameli Mugabe – iRegime Change.
Uzulu we Harare uthi osekumangalisa yikuba seziqondana zodwa lezinkokheli kuZanu Pf kusetshenziswa inkulumo yinye ebikade iqondiswe kubandla le MDC ngaphambilini ethi bekumgceke ukuba bebevele bekhona kunkokheli ebevele ihlezi ifuna ibe khona leyo nguquko kodwa isesaba ukuphumela egcekeni.
Uthi inkulumo kaGumbo yokuvuma ukuba bakhona abafuna kube lenguquko ebandleni leZanu Pf kuveza sobala obevele kusaziwa ngabanengi ukuba ibivele ikhona limicabango njalo kungabamangalisi bona njengabantu makhaza elizweni.