Abantu abangafika ikhulu abahlala eChitungwiza abasela zindlu kulandela ukudilizwa kwemizi yabo okwenziwe yizisebenzi zikamanisipala emadabuka kusa ngoLwesihlanu.
Kuthi emuzini we Epworth amapholisa acine esebenzisa intuthu ehitshayo eye tear gas ukuxotsha izakhamizi ezibambane zizama ukuvimba ukuthi izindlu zazo zingadilizwa, kwabotshwa ezinye zazo.
Umphathintambo wentuthuko yezabelo, uMnu. Ignatius Chombo utshele iStudio Seven ukuthi uhulumende uzaqhubekela phambili ediliza lezi zindlu kuhlelo olufana lolwenziwa ngomnyaka ka 2005 olwe Operation Murambatsvina.
Kubikwa kulokufuthelana okukhulu emzini we Epworth duze le Harare lapho okugcwele khona amapholisa ohlangothi oluvimba umvukela, awe riot.
Uhulumende uthi izakhamizi ezidilizelwe izindlu zakha lezi zakhiwo okungekho emthethweni kodwa isisekelo sombuso esitsha sithi uhulumende kumele aqale akhele labo ayabe ezabadilizela izindlu.
UChris Gande weStudio Seven uxoxe lomgcinisihlalo wenhlanganiso yezakhamizi, iChitungwiza Residents’ Trust, uMnu. Marvellous Khumalo ukuze sizwe okunengi ngaloludaba.