Abenhlanganiso ye Friends of Palestine Solidarity Movement in Zimbabwe babuthane eAfrica Unity Square eHarare betshengisela ukukhonona kwabo phezu kokwenzakala phakathi kwele Palestine leleIsrael.
Laba bantu bebehlabela ingoma zosizi ehlatshelwa ma kusiyabekwa umuyi njalo engowokholo lwesiIslam,kwalabo abekade bekulomkhosi owenzelwe eAfrica Unity Square ngesikhathi befola ngoLwesithathu bethwele umzekeliso wesidumbu somntwana belingisela umbuthano wemfeni.
Abatshengiseleyo laba banikeze ingcwadi yezikhalazo kumlawuli wedale lephalamende umnumzana Jacob Mudenda, bekhuthaza ukuqedwa kwempi phakathi kwamazwe womabili athi ele Palestine kanye lele Israel.
Abantu abedlula kancinyane ikhulu baphatheke kulomkhosi ongenwe labezinhlanganiso ezehlukeneyo okubalisa ezokholo lwesiIslam lolwesiKristu, abamabandla ezombusazwe amakhulu kuleli ele MDC elikhokhelwa ngumnumzana Morgan Tsvangirayi kanye lele Zanu Pf elikhokhelwa ngumongameli Robert Mugabe.
Umgcinisihlalo walenhlanganiso ye Friends of Palestine Solidarity Movement, umnumzana Tawanda Makore utshele uzulu obekulomkhosi ukuba bafuna iphele kokuphela limpi phakathi kwamazwe womabili.
Lokhu okwenzakala eGaza kwele Palestine uMakore uthi yikwephula ilungelo loluntu kakhulukazi ilungelo lokuphila kungakhathalekile ukuba umuntu ungowaluphi ukholo, ijwabu lakhe lingumbala onjani kanye lokuba ungowaliphi ilizwe.
Okunye kwalokho okumunyethwe yilengcwadi yezikhalazo yikukhuthaza aamalunga edale lephalamende eZimbabwe ukuba alandele inyathelo elithethwe ngamalunga edale le South Africa ukusola ukubulawa kwabantu kazana kwele Palestine, inengi labo kungabantwana labesifazane.