WASHINGTON DC — Izakhamizi zakoBulawayo zithi zidlela evalweni njengoba kulembiko ethi kulamankampani amanengi alakho ukuvalwa lonyaka njengalokho okwenzakale nyakenye.
Zithi kulezisebenzi ezedlula phose amakhulu amabili lamatshumi amahlanu – 250 - eze Cairns Foods ezixotshwe umsebenzi kunsukwana ezedluleyo kulandela ukuvalwa kwenkampani le eZimbabwe.
ICairns ibikwa isithi ivale ngenxa yokukhula kwezikwelede zayo lendleko esizisedlula inzuzo eyitholayo.
Izisebenzi ze Cairns Foods ezedlula inkulungwane sezilahlekelwe ngumsebenzi kulandela ukuvalwa kwenkampani le.
Inkampani ye Hunyani Printo Pack layo ibikwa ilakho ukuthutha iyevula ifekithali eHarare ngenxa yokuthi ithi iyehluleka ukusebenza ngemfanelo koBulawayo.
Umnu. Roderick Fayayo umqondisi we Bulawayo Progressive Residents’ Association uthi zithwala nzima izisebenzi nxa seziphelelwe ngumsebenzi.