Lokhu Kulokudonselana Kuhlelo LweConstitution
Ibandla le ZANU PF lithi kulezigaba ezingamatshumi amathathu okufanele zilungiswe.
Sithandekile Mhlanga
20.12.2012
WASHINGTON — Ukudonselana okuphathelane lokulotshwa kwesisekelo sombuso esitsha kuqhubekela phambili njalo ibandla le ZANU PF lithi kulezigaba ezingamatshumi amathathu okufanele zilungiswe.
Ibandla leli linqume emhlanganweni wayo omkhulu elisanda kuwuqhuba ukuthi uMongameli Robert Mugabe kumele azise ilanga lokhetho oluzaqhutshwa kusetshenziswa isisekelo sombuso esidala nxa esitsha singaphelanga ukulotshwa kuyonale iKhisimusi.
UMnu. Paul Mangwana, ilunga le ZANU PF kukhomithi eqhuba loluhlelo uthi okusaseleyo kugoqela uzibuse wezabelo, okuphathelane lomhlabathi, okwezemithetho, kanye lamandla ka mongameli.
Umpathintambo obona ngokuqhutshwa kwaloluhlelo uMnu. Eric Matinenga ubikwa esithi ikhomithi le iyehluleka ukuhlangana njengemfanelo ngoba amalunga ayo ehlezi elembambeko ezithile.Kasacacanga ukuthi zingaki ingxaki ezisaseleyo ekuphutshiseni loluhlelo.
Ukuze sihlaziye loludaba, uSithandekile Mhlanga weStudio 7 uxoxe loMnu. George Mkhwananzi, ingcwethi ecubungula ezombusazwe, njalo eyisiphathamandla secele le MDC elikhokhelwa nguMnu. Morgan Tsvangirai, yena ogcizelela ukuthi uMugabe kasela mandla okuba nguntandokayiphikiswa kuhulumende womanyano.
Ingxoxo LoMnu. George Mkhwananzi