Uhulumende wemelika uthi ulokhu ekhathazekile ngokunyamalala kukaMnu. Itai Dzamara, olwela amalungelo oluntu njalo ongumkhokheli weOccupy Africa Unity Square, esithi akutshengisi ukuthi uhulumende weZimbabwe uzimisele ukumdinga.
Embikweni owethulwe ngoLwesithathu, isigodlo seMelika eZimbabwe sithi sixhasana lomanyano weEuropean Union ukukhuthaza eleZimbabwe ukuthi lidingisise ngodaba lukaMnu. Dzamara, yena owanyamalala kunyanga ezinhlanu ezedluleyo, libophe abangabe bamthumba, njalo limbuyisele ephila emulini yakhe.
EleMelika lithi injongo yalo ngeyokulwela amalungelo oluntu njalo kusobala ukuthi amalungelo kaMnu. Dzamara awananzwanga ngoba wayelelungelo lokukhankasela umbuso okhululekileyo eZimbabwe.
Ilunga le Occupy Africa Unity Square uMnu. Charles Nyoni uthi inhlanganiso yakhe izadinga olunye njalo usekelo kwezinye izigodlo zakwamanye amazwe eziseZimbabwe ngendlela yokukhuthaza uhulumende weZimbabwe ukuthi adingisise ukuthi ungaphi uMnu. Dzamara.
