Ekuqhubekeni kodlakela oluqondiswe kwabokuza kwele South Africa umphathintambo wezomvikela kulelo lizwe, uNkosikazi Nosiviwe Mapisa-Nqakula uthi uzathumela amasotsha emzini we Alexandria edolobheni le Johannesburg.
UMapisa - Nqakula uthi kulababili, umuntu lomkakhe abadutshiliweyo izolo eAlezandria. Lanxa imbiko ephume kuqala ibisithi bafile uMapisa - Nqakula uthi hatshi basindile basesibhedlela.
Lanxa uhulumende esithi sekufe abantu abayisithupha kudlakela oluqale edolobheni le Durban kumaviki phose amabili adluleyo inani uqobo alazakali ngoba abanye bathiwa ngababulewe yizikliwi kungelani lokwenza lodlakela oluqondiswe kwabokuza.
Umphathintambo wesigaba se Matabeleland South, uMnu. Abednico Ncube, uhlangabeze izizalwane ze Zimbabwe ezingamakhulu amane edolobheni le Beitbridge izolo.
UNcube utshele iphephandaba le The Herald ukuthi uhulumende uthumele amabhasi amathathu kwathi ezinye inhlanganiso angazibethanga ngamagama lazo zasusa amabhasi amathathu.
Udlakela lolu luqhubeka lanxa inkosi uMnu. Goodwill Zwelithini enze imbizo izolo wakhuza abantu ukuthi bengabulali abokuza.
UZwelithi nguye owetheswa icala lokuqala lobu budlwangudlwangu ngamazwi awethula kumaviki amathathu adluleyo. Kodwa uyalandula lokhu esithi intathelizindaba yizo ezitshekisa inkulumo yakhe.
UChris Gande weStudio Seven uxoxe lengcwethi ecubungula ezombusazwe, uMnu. Dinizulu Macaphulana othi ubudlwangudlwangu lobu bukhanya bubangelwa ngabanye abantu abalemali.