amalinks wokungena

Breaking News

EleZimbabwe linanza Ilanga leWorld Aids Day


Umhlangano ophathelane lengculaza owe ICASA
Umhlangano ophathelane lengculaza owe ICASA

Ele Zimbabwe limanyene lamazwe womhlaba ukunanza ilanga le World AIDS Day ngoLwesibili elinanzwa minyaka yonke mhlaka 1 Mpalakazi, ngesikhathi umhlangano omkhulu weInternational Conference on AIDS and STIs in Africa, uqhubeka elizweni uhluza ngokuthi kungaqedwa njani ukuthelelwa kwensane kanye lamantombazana asakhulayo igcikwane lengculaza ukuze kugcwaliseke ukuqeda lumkhuhlane lapho kusiyafika umnyaka ka2030.

Uhlangothi lwenhlanganiso yomanyano wamazwe womhlaba olukhangela ngezabantwana, olwe United Nations Children’s Fund (UNICEF), ithi ingculaza yiyo imbangela yokufa kwenani eliphezulu labantwana abaphakathi kweminyaka elitshumi kusiya kwelitshumi lasitshiya galolunye ezwekazi le Africa, njalo lelinani liya liqonga.

Umqondisi we UNICEF eZansi le Mpumalanga yezwekazi le Africa, uNkosikazi Leila Pakkala
Umqondisi we UNICEF eZansi le Mpumalanga yezwekazi le Africa, uNkosikazi Leila Pakkala

Ekhuluma emhlanganweni we ICASA 2015, umqondisi we UNICEF eZansi le Mpumalanga yezwekazi le Africa, uNkosikazi Leila Pakkala, uthi inani labantwana elibulawa yingculaza selaqonga ngokuphindwe kathathu kusukela kumnyaka ka 2000.

Lanxa uhlelo lokuvikela ukuthelelwa kwensane ingculaza, iPrevention of Mother to Child Transmission, solwavikela phezu kwesigidi sabantwana, uthi ngahola linye ngalinye insane ezingamatshumi amabili lanhlanu zithelelwa leligcikwane.

Abesifazana yibo abavame ukuhlolwa bathi sebetholakale belegcikwane, uthi baphinde betheswe umlandu wokuza lomkhokha ekhaya ngabomkabo.

Umhlangano ophathelane lengculaza owe ICASA
Umhlangano ophathelane lengculaza owe ICASA

Umbukiso we ICASA 2015 ulendawo lapho okwenziwa khona imidlalo yokuzilibazisa, inkondlo kanye lezingoma mayelana lengculaza, iCommunity Hall.

Umbukiso emhlanganweni weICASA
Umbukiso emhlanganweni weICASA

Umbukiso walonyaka, ungowakuqala ukuthi kukulunyiswane ngomkhuhlane weEbola njengomunye wengulamakhwa ngemva kokunanzelela ukuthi lawo uyathelelwana emacansini.

Lanxa umsebenzi usesemnengi, kulamazwe aqhuba kuhle agoqela iEthiopia, iEritrea, iRwanda, iMalawi, iMozambique, iTanzania kanye le Uganda ezenelisa ukugcwalisa isinqumo sama Millenium Development Goals esokwehlisa inani labantwana elifa ngaphansi kweminyaka emihlanu.

XS
SM
MD
LG