Iqembu lomdlalo wenguqu ele Dynamos livale isikhala esiphakathi kwalo leqembu elihlezi phezu kwengalane yemiklomelo ele Chicken Inn ngemva kwemidlalo yeviki lamatshumi amabili lane kusigaba se Premier Soccer League.
Iqembu leDeMbare linqobe iqembu le Chicken Inn nge 1 ka nya emdlalweni obusenkundleni ye Barbourfields ngeSonto okuyimpumela etsho ukuba lawa maqembu asehlukaniswa yimiklomelo emine engalaneni yemiklomelo.
Iqembu le Chicken Inn lilokhu lihlezi kundawo yakuqala lilemiklomelo engamatshumi amane lathoba munwe munye (49) kuthi ele Dynamos lihlezi kundawo yesithathu lilingene ngemiklomelo leqembu le FC Platinum elikundawo yesibili womabili elemiklomelo engamatshumi amane lanhlanu (45) iqembu ngalinye.
Iqembu le FC Platinum libe ngutshiki lobhanqa kungela qembu elenelise ukulitshayela emambuleni leqembu le Tsholotsho ngoMgqibelo enkundleni ye Luveve.
Kundawo yesine kuhlezi iqembu le Triangle lona elilemiklomelo engamatshumi amathathu lathoba minwe mbili (38) kuthi ngemva kwalo kuleqembu le Caps United elibhaxabule ele Highlanders nge 3 ka 1 ngeSonto lona elilemiklomelo engamatshumi amathathu lesikhombisa (37).
Iqembu le Harare City lona elibe ngutshiki lobhanqa 0-0 lele Triangle likundawo yesithupha lilemiklomelo engamatshumi amathathu lanhlanu (35) okulinani elilingana leliqembu le Chapungu elikundawo yesikhombisa.
Kundawo yethoba minwe mbili kuleqembu le Hwange elilemiklomelo engamatshumi amathathu lambili (32) njalo lilingene ngemiklomelo leqembu le How Mine elihlezi ngaphansi kwalo.
Iqembu le Highlanders lihlezi kundawo yetshumi lilemiklomelo engamatshumi amabili lathoba minwe mbili (28).
Kundawo yetshumi lanye kutholakala iqembu le ZPC Kariba lona elilemiklomelo engamatshumi amabili lesikhombisa (27) kuthi ngaphansi kwalo kuleqembu le Buffaloes elilemiklomelo engamatshumi amabili lanhlanu (25).
Iqembu le Tsholotsho lihlezi kundawo yesine nxa usuka emsileni wengalane lilemiklomelo engamatshumi amabili lambili (22) ngemva kokuthola umklomelo owodwa emdlalweni walo leqembu le FC Platinum ngoMgqibelo.
Ekhuluma lentatheli ngemva kwalumdlalo umqeqetshi weqembu le Tsholotsho uLizwe Sweswe uthe lumklomelo ulakho ukubasiza empini yokusinda ekugunyulweni kusigaba sePSL.
Ngaphansi kweqembu le Tsholotsho kulamaqembu athi ele Flame Lily kanye lele Whawha wona alemiklomelo engamatshumi amabili (20) iqembu ngalinye kuthi iqembu elijeke amanye engalaneni ngele Dongo Sawmills elilemiklomelo elitshumi lathoba minwe mbili (18).
…………………………………….
Sikhangele okwenzakale kwamanye amazwe emdlalweni wenguqu, elizweni lase South Africa iqembu le Platinum Stars yilo elihlezi phezu kwengalane lilemiklomelo elitshumi lane njalo lilingene ngemiklomelo leqembu le Mpumalanga Black Aces.
Ngase Ngilandi iqembu le Manchester United yilo eselihlezi phezu kwengalane lilemiklomelo elitshumi lesithupha ngemva kokutshaya elikwenze iqembu le Sunderland nge 3 ka 1.
Kundawo yesibili kuhlezi iqembu le Manchester City lona elilemiklomelo elitshumi lanhlanu njalo elitshaywe nge 4 ka 1 ngele Tottenham.
Elizweni le Spain iqembu le Villareal yilo elihamba phambili lilemiklomelo elitshumi lesithupha njalo litshiya ele Barcelona elihlezi kundawo yesibili ngomklomelo owodwa kuthi ele Real Madrid elikundawo yesithathu lilemiklomelo elitshumi lane.
………………………………….
Kweminye imidlalo engasiyo eyenguqu iqembu elimela ilizwe emdlalweni kakhilikithi linqotshwe ngama runs alitshumi lantathu liqembu le Pakistan emdlalweni wakuqala owohlobo lwe Twenty20 obusenkundleni ye Harare Sports Club ngeSonto.
Iqembu le Pakistan liqale ukutshaya ibhola lathola ama runs angu 136 lilahlekelwe ngabadlali abayithoba minwe mbili kwathi ele Zimbabwe seliphendula lathola ama runs angu 123 lilahlekelwe ngabadlali abayithoba munwe munye.
Lawa maqembu azadibana kumdlalo wesibili owohlobo lwe Twenty20 kusasa ngoLwesibili khona njalo enkundleni ye Harare Sports Club.
Kolunye udaba oluhambelana lalolu iqembu elimela ilizwe emdlalweni we rugby sevens linqotshwe nge 24 ka nya ngele South Africa Academy ku final eyomncintiswano we SAFland Sevens International tournament obuqhutshelwa elizweni le Namibia ngempelaviki edluleyo.
Kucele labesifazane iqembu le Zimbabwe liphelele kusigaba se semi final lapho elitshyawe khona nge 39 ka 0 ngele Kenya.
