amalinks wokungena

Breaking News

Abesifazana beZimbabwe abaseSouth Africa Bananza i-16 Days of Activism


16 Days of Activism Against Gender Based Violence.
16 Days of Activism Against Gender Based Violence.

Ngesikhathi eleSouth Africa limanyana lamanye amazwe emkhankasweni wensuku ezilitshumi lesithupha wokulwisa ukuhlukuluzwa kwabesifazana labantwana, abanye abesifazana beZimbabwe abaseSouth Africa bathi bathwelenzima ngokuhlukuluzwa ezindlini, emisebenzini lasezitaladeni kodwa besesaba ukuyamangala emapholiseni ngoba bengelangcwadi ezisemthethweni zokuhlala kwele South Africa.

Noma kunjalo ikomishini ebona ngokulingana kwabesilisa labesifazana ikhuthaza laba omama ukuthi bengafeli ngaphakathi kodwa babuyise izikhalazo zabo kuyo ukuze bathole usizo.

Kusukela mhlaka 25 linyanga kusiya fika umhlaka 10 Mpalakazi umhlaba wonke jikelele uphakathi komkhankaso wokuququzela ukuhlonitshwa lokunazwa kwamalungelo abesifazana kanye labantwana.

Izinkulungwane zabesifazana beZimbabwe abahlala kwele South Africa labo bayingxenye yalabo abananza lezinsuku. Kodwa inengi labeZimbabwe laba lithi kusasekunengi ukuhlukuluzwa abakwenziwa ngabesilisa kwele South Africa.

Unkosazana Zinhle Ndlovu, ohlala eJohannesburg uthi ubunzima abahlangana labo ngobokuthi bayesaba ukuyamangala emapholiseni njengoba sekungafika sekubotshwa wena kuthiwe uselizweni ngokungekho emthethweni.

Abanye bathi bahlukuluzwa ngabomkabo kumbe labo abahlalisana labo ezindlini. Kulelinye njalo ihlekana elithi emisebenzini bahlukunyezwa zinkokheli zesilisa ezibabamba ngamandla ukwabelana ucansi ukuze bengaxotshwa emsebenzini.

Bakhona njalo, ikakhulu abangelancwadi zokuhlala kwele South Africa ngokusemthethweni abathi amapholisa lawo azenzela santando kubo ukuze bangayivalelwa.

UNkosazana Siphathisiwe Dube odabuka eTsholotsho ngokuzalwa, uthi uhleli ebhaxabulwe ngumkakhe imini lebusuku. Yenake uthi uke wayamangalela emapholiseni kodwa wacina esesiyancenga ukuthi bamkhiphe njengoba kwasekufanele abuyiselwe eZimbabwe, okwakuzakwenza yena labantwana basale bebulawa yindlala.

Kodwake ikomisini ebona ngokulingana kwamalungelo abesilisa labesifazana ikhuthazaa abeZimbabwe laba labanye abavela kwamanye amazwe ukuthi bengafeli ngaphakathi.

Omunye waboSikomitshi wale ikomishini unkosikazi Nomasonto Mazibuko, uthi akula muntu okufanele esabe ukumela amalungelo akhe njalo abesaba ukuya emapholiseni kabaze kule ikomishini ibasize ngakho konke okudingakalayo ukuthi amalungelo abo ahlonitshwe.

Imbiko yokuhlukunyezwa, ukutshaywa, ukubanjwa iganyavu leyokubulawa kwabesifazana kwele South Africa sekuyinto yansukuzonke, kantike abesifaza laba kugoqela labeZimbabwe balethemba lokuthi kuzathi kusiyaphela umkhankaso walonyaka ukuhlukuluzwa kwabo sekunganeno.

XS
SM
MD
LG