amalinks wokungena

Breaking News

I-Highalnders Iqalisa Amalungiselelo Emidlalo Yalonyaka


Iqembu lenguqu Highlanders selisungule amalungiselelo alo esizini yalonyaka ikanti amanye amaqembu ako Bulawayo adlala kusigaba saphezulu lawo akhangelelwe ukuqala ensukwini ezilandelayo.

Umqeqetshi omutsha weqembu le Highlanders uBongani Mafu ngoMvulo ubekhangela abadlali abakhethwa ngemva kohlelo oluqhutshwe ngowayengu Technical Advisor kuleliqembu ekupheleni kwanyakenye uCosmas Zulu inhloso yakhe kuyikuba athathe labo abatshengisa ithemba lokuba bengenelisa ukudlala esigabeni saphezulu.

Abadlali abavele bengabeqembu le Bosso bona bazaqala ngoLwesibili ukuphatheka kumalungiselelo awokuzilolonga phambilini kokuqala kwemidlalo yalonyaka yona ekhangelelwe ukuqala ngenyanga kaMabasa.

UMafu usebenza ndawonye lo Mandla Mpofu ongumsekeli wakhe, uPeter Nkomo ongumqeqetshi wabonozinti ikanti umaneja weqembu omutsha ngu Netsai Moyo.

Iqembu elingene lonyaka kusigaba se PSL ele Tsholotsho likhangelele ukuqala kusasa amalungiselelo alo okukhankasa kusigaba saphezulu ikanti ele Chicken Inn lona likhangelelwe ukuqala amalungiselelo alo alonyaka ngoLwesithathu.

……………………………………………………………………………………………………………………………………………………………………………………………………………………………………………………………………………………………………………………………………

Sikhangele imidlalo yenguqu edlalwe kwamanye amazwe;

Iqembu elimela ilizwe le South Africa elaziwa kakhulu ngelokuthi Bafana Bafana linqobe ele Zambia nge 1 ka nya emdlalweni wokuzwana amandla oyingxenye yamalungiselelo alo okuyaphatheka kumidlalo yezwekazi le Africa ezaqala mhla zilitshumi lesikhombisa kuyonale inyanga elizweni le Equatorial Guinea.

Elizweni laseSpain kwenzakale izimanga njengoba iqembu ebelilokhu lingakanqotshwa kuligi lonyaka ele Real Madrid linqotshwe nge Valencia nge 2 ka 1 kwathi lele Barcelona lalo latshaywa nge 1 ka nya ngele Real Sociedad.

Limpumela itshiye iqembu le Real Madrid lilemiklomelo engamatshumi amathathu lathoba munwe munye kuthi ngemva kwalo kule Barcelona le Atletico Madrid ezilemiklomelo engamatshumi amathathu lathoba minwe mbili.

NgaseNgilandi iqembu elihlezi phezu kwengalane ele Chelsea selingutshiki lobhanqa lele Manchester City ngemva kokutshaywa kwalo ngele Tottenham kwathi ele City lona linqobe ele Sunderland.

Womabili lawa maqembu alemiklomelo engamatshumi amane lesithupha ngemva kwemidlalo engamatshumi amabili.

………………………………………………………………………………………………………………………………………………………………………………………………………………………………………………………………………………………………………………………………….

Sikhangele umdlalo kakhilikithi;

Iqembu elimela ilizwe le Zimbabwe emdlalweni kakhilikithi kusasa lizadlala umdlalo walo wakuqala owohlobo lwe One Day International leqembu le Canada enkundleni ye Harare Sports Club.

Lumdlalo uzalandelwa ngeminye emithathu ezakuba khona mhlaka 8, mhlaka 10 kanye lamhlaka 12 njalo iqembu le Zimbabwe lizabe libizwa ngokuthi yiZimbabwe A loba nje lizabe lilabadlali abayake bedlalele iqembu lesizwe uqobo.

XS
SM
MD
LG