Iqembu lenguqu ele Highlanders yilo eliphakamise inkezo ye ZNA Commanders Charity Shield ngemva kokunqoba ele Dynamos nge 1 ka nya ku final ngeSonto enkundleni ye Rufaro.
Ukunqoba kweqembu le Highlanders kuze ngemva kweminyaka emine leliqembu lacina ukunqoba ele Dynamos lapho elinqobe khona eleDeMbare kunkezo ye Independence ngomnyaka ka 2011.
NgeSonto umgadli weqembu le Bosso uObidiah Tarumbwa nguye ohlohle umklomelo ohlukanise lawamaqembu ngehlandla lesibili lomdlalo.
Iqembu le Highlanders lithole inkulungwane ezilitshumi lambili zamadola asemelika ngokunqoba elikwenze ngeSonto kuthi ele Dynamos lithole inkulungwane eziyithoba minwe mbili zamadola asemelika.
Isiphathamandla seqembu le Highlanders uNdumiso Gumede uthe iqembu lizakupha abadlali ingxenye yalimali kuthi eyinye ingxenye isetshenziswe ukubhadala izikwelede ezibhekane leqembu.
Kolunye udaba olumayelana lomdlalo wenguqu iqembu lamajaha aleminyaka engaphansi kwamatshumi amabili lantathu elimela ilizwe linqotshwe nge 3 ka nya liqembu labosowabo elimela ilizwe le South Africa ngoMgqibelo.
Nxa sekuhlanganiswa lempumela yomdlalo wakuqala odlalelwe kwele Zimbabwe kumaviki amabili edluleyo iqembu le South Africa linqobe nge 4 ka 1 njengoba umdlalo wakuqala uphele zingutshiki lobhanqa 1 ka 1.
Limpumela itsho ukuba iqembu le South Africa yilo eliphumelele ukuyaphatheka kumidlalo ye CAF Under 23 Championship ezaqhutshelwa elizweni le Senegal.
.............................................................................
Sikhangele umdlalo kakhilikithi;
Iqembu elimela ilizwe leZimbabwe linqobe ele New Zealand ngama wickets ayisikhombisa emdlalweni wakuqala owohlobo lwe One Day International odlalelwe enkundleni ye Harare Sports Club ngeSonto.
Iqembu le New Zealand yilo eliqale ukutshaya ibhola labuthelela ama runs angamakhulu amathathu lantathu (303) lilahlekelwe ngabadlali abane kuma overs angamakhulu amahlanu (50) kwathi ele Zimbabwe seliphendula lathola ama runs angamakhulu amathathu lane (304) lilahlekelwe ngabadlali abathathu kuma overs angamatshumi amane lathoba munwe munye (49).
Lawa maqembu azadibana njalo kusasa ngoLwesibili kumdlalo wesibili owohlobo lwe ODI kuthi owesithathu ukhona ngoLwesihlanu mhla ziyisikhombisa.
NgeSonto lawamaqembu azadibana kumdlalo owohlobo lwe Twenty20 njalo ongowokucina khona njalo enkundleni ye Harare Sports Club.