amalinks wokungena

Breaking News

Iqembu leHighlanders Liqhubeke Likhokhela Engalaneni Yemiklomelo eyePSL


Bosso
Bosso

Iqembu lenguqu ele Highlanders liviki liqhubeke liphezulu kwengalane yemiklomelo esigabeni saphezulu eseCastle Premier Soccer League ngemva kwemidlalo ebikhona ngempelaviki.

Iqembu le Highlanders likhuphule inani lemiklomelo yalo laya kumatshumi amabili lesikhombisa ngemva kokunqoba elikwenze ele How Mine ngeNsonto.

IBosso itshiye amaqembu ayiphefumulela entanyeni athi ele Dynamos kanye lele CAPS United ngomklomelo owodwa kuthi iqembu elihlezi kundawo yesine eleZPC Kariba lilemiklomelo engamatshumi amabili lane.

Kundawo yesihlanu kuhlezi iqembu le Hwange lona elilemiklomelo engamatshumi amabili lambili njalo lilingene ngemiklomelo le How Mine kanye le Shabanie Mine.

Iqembu le Chicken Inn lihlezi kundawo yetshiyagalo mbili lilemiklomelo engamatshumi amabili kuthi ngemva kwalo kule FC Platinum elilemiklomelo elitshumi lathoba munwe munye.

Kundawo yetshumi kuleqembu le Buffaloes elilemiklomelo elitshumi lesikhombisa ngemva kwalo kule Chapungu elemiklomelo elitshumi lesithupha.

Ngemva kwe Chapungu kule Harare City elemiklomelo elitshumi lane ikanti amaqembu ahlezi kundawo ezine ngaphansi kwengalane ngathi iTriangle, iBantu Rovers, iBlack Rhinos kanye le Chiredzi.

********************************************

Kolunye udaba olumayelana lomdlalo wenguqu imidlalo yezizwe zomhlaba iqhubekela phambili elizweni le Brazil kusasa ngoLwesibili lapho iqembu le Brazil elizadibana khona lele Germany ngehola letshumi ebusuku emdlalweni wakuqala owesigaba se semi-final.

Iqembu leBrazil lizabe lingelamdlali walo elimthembileyo uNeymar yena owalimala iqolo emdlalweni walo lele Colombia.

Umdlalo wesibili owesigaba se semi-final ukhona ngoLwesithathu njalo uzakuba phakathi kwe Argentina le Netherlands.

************************************

Sikhangele umdlalo weRugby:

Iqembu elimela ilizwe kuhlobo lwerugby edlalwa ngabadlali abalitshumi lanhlanu kuzamele liqhubekele phambili lilokhu lizama ukuthola ilungelo lokuyadlala kumidlalo yezizwe zomhlaba ngomnyaka ozayo ngemva kokuqeda imidlalo eyomncintiswano we Africa Cup likundawo yesibili ngemva kweqembu elimela ilizwe le Namibia.

IZimbabwe iNamibia kanye le Kenya zidlale ngokufanayo kulumncintiswano njengoba zinqobe kabili zanqotshwa kanye kodwa iqembu le Namibia liqede imidlalo liphezulu ngoba lona lenelise ukuthola umvuzo wokuba lithole ama try amane emdlalweni walo lele Madagascar.

IZimbabwe isizadlala leqembu le Russia kuthi ingaphumelela lapho idibane leqembu elizanqoba phakathi kwe Uruguay kanye le Hong Kong njalo inganqoba lapho yikho ezathola khona ilungelo lokuyadlala emidlalweni yezizwe zomhlaba ezakuba seNgilandi ngomnyaka ozayo.

XS
SM
MD
LG