WASHINGTON DC — Idolobho lakoBulawayo lilahlekelwe ngamanzi amanengi kakhulu ngoLwesihlanu kulandela ukudubuka kwempompi ethwala amanzi, eduzane lesitalada sikaFive Street lo3rd Avenue.
Impompi le idutshulwe ngeputha yizisebenzi zenkampani kagetshi eyeZesa zizama ukulungisa amagetsi kwesinye isititshi.
Amanzi la abikwa echitheke okwesikhathi esedlula amahola amabili kwalahleka amakhulu lamakhulu ama-liter.
IBulawayo ibhekane lodubo lwamanzi olukhulu njalo umanisipala uvalela izakhamizi amanzi okwamalanga amathathu ngeviki.
Kodwa embikweni awethule ngoLwesine umanisipala uxwayise uzulu ukuthi ulakho ukwengeza amalanga la abemane.
Umanisipakla ukhuthaze njalo izakhamizi ukuthi zifulashe izambuzi zazo kanye-kanye ngehola lesikhombisa ntambama, 7:30, ngelanga amanzi avulwa ngalo ukwenqabela ukudubuka kwempompi ezithwala ingcekeza.
Lanxa amadolobho amanengi ebhekane lohlupho lwamanzi, olwakoBulawayo lukhanya lubhaha ngamandla.
Egqiba okusemthethweni uhlelo lokutholiswa kukazulu amanzi ahlanzekileyo ngoLwesihlanu, iSanitation Week, umsekeli kaMongameli uJoice Mujuru uthe uhulumende uzakwenza konke okusemandleni akhe ukulungisisa udubo lwamanzi elizweni.
Isiphathamandla senhlanganiso emela izakhamizi koBulawayo, iBulawayo Progressive Residents Association, uMnu Rodrick Fayayo, usole izisebenzi zeZesa ngokwehluleka ukunanzelela impompi eziyidubulileyo.