Ele Zimbabwe lilakho ukujeziswa yinhlanganiso ebona ngokuqhutshwa komdlalo wenguqu kuzwekazi le Africa eye CAF ngemva kokwehluleka kweqembu labesifazane elimela ilizwe emdlalweni wenguqu ukuyadlala kwele Ivory Coast ngempelaviki edluleyo.
Iqembu labesifazane elimela ilizwe emdlalweni wenguqu libhekane lesijeziso esokuthathelwa ilungelo lokuphatheka kumidlalo eqoqwa yinhlanganiso ye Caf okweminyaka ethile ngemva kokwehluleka kwalo ukuyadlala lele Ivory Coast ngeSonto emdlalweni womncintiswano owokudinga amaqembu azakuyaphatheka kumidlalo yama Olympics.
Lokhu kungoba inhlanganiso ebona ngokuqhutshwa komdlalo wenguqu elizweni eye Zifa yehluleke ukuthola imali yokugadisa leliqembu indizamtshina yokulisa khonale eIvory Coast.
Abadlali beqembu le Mighty Warriors baveze ukudana okukhulu ngalesisehlakalo esilakho ukuphazamisa ibhola labesifazane elizweni.
Kusenjalo iqembu lamajaha aleminyaka engamatshumi amabili lantathu elimela ilizwe emdlalweni wenguqu lisele lilomthwalo onzima kumkhankaso owokuyadlala kumidlalo ye African Championships ngemva kokuba libe ngutshiki lobhanqa 1-1 lelabosowabo elimela ilizwe le South Africa ngeSonto esigodlweni iHarare.
Lawamaqembu azaphindana umphehlo ngemva kwamaviki amabili emdlalweni ozakuba elizweni le South Africa njalo ele Zimbabwe sekuzamele linqobe kumbe libe ngutshiki lobhanqa lihlohle imiklomelo emibili kumbe edlula lapho ukuze liphumelele ngoba umklomelo we South Africa ewuhlohle idlala ingekho ekhaya ubalwa kabili.
............................................................
Sikhangele impumela yeminye imidlalo ebikhona ngempelaviki;
Iqembu elimela ilizwe le Zimbabwe emdlalweni we tennis linqobe ele Moldova nge 5 ka nya kumidlalo eyokudinga ukuba yiliphi iqembu elizayala lilokhu lidlala kusigaba se Euro - Africa Zone Group II kumncintiswano wenkezo ye Davis Cup.
Iqembu le Zimbabwe belimelwe ngabadlali abathi uTakanyi Garanganga lo uBenjamin Lock abadlale imidlalo yama singles kanye lo Courtney Lock lo Mark Fynn bona abadlale imidlalo yama doubles.
Emdlalweni kakhilikithi iqembu elimela ilizwe le Zimbabwe linqobe ele India ngama runs alitshumi emdlalweni wesibili njalo ungowokucina owohlobo lwe Twenty20.
Limpumela itsho ukuba ilizwe le Zimbabwe lenelise ukukhipha inhloni njengoba linqotshwe kuyo yonke imidlalo emithathu eyohlobo lwe One Day International elandelwe ngeyohlobo lwe Twenty20 yona ephele iIndia inqobe kowodwa kwathi le Zimbabwe inqobe kowodwa njalo.
.......................................................................................
Umdlali wenqindi oyisizalwane se Zimbabwe kodwa osebenzela elizweni le Zambia uCharles Manyuchi wenelise ukuvikela isicoco sakhe ese WBC welterweight ngemva kokukhulela umdlali wase Italy uGianculla Frezza kuhlandla lesithupha esomdlalo obekumele uphele sekutshaye ihlandla letshumi lambili.
Lumdlalo uqhutshelwe khonale kwele Italy njalo bekungokwakuqala ukuba uManyuchi ayekulwa phetsheya kolwandle.