Kulandela ukulotshwa kwesivumelwano sokukhulumisana kwebandla leMDC elikhokhelwa nguMnu. Welshman Ncube lecele le MDC Renewal Team amabandla omabili la athi alakho ukumanyana ngeviki ezayo.
Amaqula amabandla la ahlangene ngoMvulo ko Bulawayo lapho agqibe inkulumo zokumanyana lanxa zizaqhubeka ngeviki ezayo ukuze kumanyaniswe amabandla la omabili.
Isikhulumeli secele leMDC ekhokhelwa nguMnu. Ncube, uMnu. Nhlanhla Dube ulandule imbiko ethi ibandla elimanyeneyo lizkhokhelwa nguMnu. Tendai Biti.
Iphephandaba le Sunday News libe lodaba oluthi lithole ugwalo oluvela kumabandla omabili oluthiwa yi 12 point plan olukhomba ukuba lelibandla lizakhokhelwa nguMnu. Tendabi Biti esekelwa nguMnu. Ncube kuthi umkhokheli we NCA uzakuba ngunobhala jikelele.
Isikhulumeli seMDC ka Mnu. Ncube, uMnu. Nhlanhla Dube utshele iStudio Seven ukuthi amabandla omabili la asekhangelele ukugqiba inkulumo abe libandla linye ngeviki ezayo.
UChris Gande uphinde waxoxa lomgcinisihlalo we MDC Renewal Team, uMnu. Sam Sipepa Nkomo laye othi sebezagqiba inkulumo yokumanyana.
