Imidlalo yenguqu edlalwe emazweni aphetsheya ngempelaviki edluleyo iphele kanje.
Elizweni lase Ngilandi iqembu le Chelsea selikhokhela ngemiklomelo eyisikhombisa phezu kwengalane yemiklomelo ngemva kokunqoba elikwenze ele Aston Villa nge 2 ka 1 kwathi iqembu elihlezi endaweni yesibili ele Manchester City laba ngutshiki lobhanqa 1 – 1 lele Hull City.
Limpumela itshiye iqembu le Chelsea lilemiklomelo engamatshumi amahlanu lesithupha (56) ngemva kokudlala imidlalo engamatshumi amabili lane ikanti ele Man City lilemiklomelo engamatshumi amane lethoba munwe munye (49).
Iqembu le Southampton liphefumulela entanyeni yeqembu le Manchester City lilemiklomelo engamatshumi amane lanhlanu (45) kuthi endaweni yesine kuhlezi iqembu le Manchester United elilemiklomelo engamatshumi amane lane (44).
Elizweni le Spain iqembu Real Madrid selikhokhela ele Barcelona ngomklomelo owodwa ngemva kokutshaywa kwalo nge 4 ka nya ngele Atletico Madrid kwathi ele Barcelona lona labhaxabula ele Athletic Club nge 5 ka 2.
Limpumela itshiye iReal Madrid ilemiklomelo engamatshumi amahlanu lane (54) kuthi ele Barcelona lilemiklomelo engamatshumi amahlanu lantathu (53) ikanti ele Atletico Madrid lisendaweni yesithathu lilemiklomelo engamatshumi amahlanu (50).
**************
Sikhangele umdlalo kakhilikithi;
Umdlalo wokuzwana amandla obuphakathi kweqembu elimela ilizwe le Zimbabwe emdlalweni kakhilikithi lele New Zealand ngoMvulo ekuseni awusafikanga emaphethelweni ngemva kokuba uphazamiswe lizulu.
Lumdlalo oyingxenye yamalungiselelo amaqembu womabili okuphatheka kumidlalo yezizwe zomhlaba eqala mhla zingamatshumi lane kuyonale inyanga njalo uqoqwa ngamazwe athi ele New Zealand lele Australia umiswe ngesikhathi iqembu le New Zealand selenelise ama runs ayi 157 ngemva kokulahlekelwa ngabadlali abayisikhombisa.
Iqembu le Zimbabwe elikusibaya sika Pool B lizadlala omunye umdlalo wokuzwana amandla lele Sri Lanka ngoLwesithathu kuthi umdlalo walo wakuqala kumncintiswano wezizwe zomhlaba ukhona ngeNsonto lapho elizadlala khona lele South Africa.
Amanye amaqembu akusibaya sika Pool B ngathi ele India, ele Pakistan, ele West Indies, ele Ireland kanye lele United Arab Emirates.