Iqembu lenguqu ele Chicken Inn yilo eselihlezi phezu kwengalane yemiklomelo ngemva kwemidlalo yeviki lesithupha esigabeni se Premier Soccer League ebikhona ngempelaviki edluleyo.
Iqembu le Chicken Inn lindize layahlala phezu kwengalane yemiklomelo ngemva kokunqoba elikwenze ele How Mine nge 1 ka nya ngoMgqibelo enkundleni yeLuveve okuyimpumela etshiye leliqembu lilemiklomelo elitshumi lanhlanu ngemva kwemidlalo eyisithupha.
Kundawo yesibili kuhlezi iqembu leDynamos lona elilemiklomelo elitshumi lane njalo elibe ngutshiki lobhanqa lele Harare City ngoMgqibelo njalo kungela qembu elenelise ukulitshayela emambuleni.
Iqembu ebelikhokhela engalaneni phambilini kwemidlalo yeviki lesithupha ele Triangle lehle layahlala kundawo yesithathu lilemiklomelo elitshumi lantathu ngemva kokunqotshwa kwalo ngele Flame Lily ngoMgqibelo kuthi iqembu le Highlanders yilo elihlezi kundawo yesine lilemiklomelo elitshumi ngemva kokunqoba kwalo ele Dongo Sawmill nge 1 ka nya ngeSonto.
Kundawo yesihlanu kutholakala iqembu le ZPC Kariba lona elilemiklomelo eyithoba munwe munye njalo lilingene ngemiklomelo lamaqembu athi ele How Mine kanye lele Harare City.
Iqembu leTsholotsho lihlezi kundawo yesitshiya galo mbili lilemiklomelo eyitshiyagalo mbili njalo lilingene ngemiklomelo lamaqembu ahlezi ngaphansi kwalo athi ele Chapungu kanye lele Caps United.
Iqembu le Whawha lithe ngokunqoba elikwenze ele FC Platinum nge 2 ka 1 ngoMgqibelo lathuthukisa inani lemiklomelo yalo yaba mihlanu okulinani elilingana lele Flame Lily .
Amaqembu ahlezi kundawo ezine ezingaphansi kwengalane ngathi ele FC Platinum, ele Hwange, kanye lele Buffaloes womathathu elemiklomelo emine kuthi iqembu elijeke amanye ngele Dongo Sawmill elilemiklomelo emibili.
...................................................................................................................................................................................................................................................................................................................
Sikhangele imidlalo yenguqu edlalwe kwamanye amazwe ngempelaviki edluleyo;
Elizweni le Germany iqembu le Bayern Munich yilo intshantshu njalo kusigaba seBundesliga okungokwesithathu iminyaka ilandelana ukuba liphakamise lesisicoco ikanti ngokwamatshumi amabili lanhlanu kumbali yaleliqembu ukuba liphakamise inkezo yeligi.
Iqembu le Bayern Linqobe ele Hertha Berlin nge 1 ka nya ngoMgqibelo kwathi lelo elihlezi kundawo yesibili ele Vfl Wolfsburg linqotshwe ngempumela efanayo ngele Borussia Monchengladbach.
Iqembu le Bayern lilemiklomelo engamatshumi ayisikhombisa lesithupha kuthi ele Wolfsburg lilemiklomelo engamatshumi ayisithupha lanye womabili lawa maqembu esele lemidlalo emine okutsho ukuba loba sekunjani akungeke kwenzeke ukuba kube leqembu elingahwitha ele Bayern IBayern ilethuba njalo elokuphakamisa inkezo ezithi eye UEFA Champions League kanye leye German Cup.
NgaseNgilandi iqembu leChelsea lilsesimeni esihle esokuphakamisa inkezo yeligi ngemva kokuba libe ngutshiki lobhanqa lele Arsenal kungela elenelise ukulitshayela emambuleni okuyimpumela etshiya leliqembu lilemiklomelo engamatshumi ayisikhombisa lesikhombisa ngemva kokudlala imidlalo engamatshumi amathathu lantathu kuthi lawo ahlezi ngemva kwalo athi ele Manchester City kanye lele Arsenal alemiklomelo engamatshumi ayisithupha lesikhombisa ngemva kokudlala imidlalo engamatshumi amathathu lane.
Elizweni le Spain iqembu le Barcelona lalele phezu kwengalane ngemva kokunqoba kwalo ele Espanyol nge 2 ka nya ngoMgqibelo okuyimpumela elitshiye lilemiklomelo engamatshumi ayithoba minwe mbili lanye njalo litshiye iqembu elihlezi endaweni yesibili ele Real Madrid lona elinqobe ele Celta Vigo nge 4 ka 2 ngeSonto ngemiklomelo emibili.
Komakhelwane elizweni le South Africa amaqembu athi ele Ajax Cape Town kanye lele Mamelodi Sundowns yiwo afinyelele ukuyadlala kufinal yenkezo ye Nedbank ngemva kokuba ele Ajax linqobe ele Supersport nge 2 ka 1 ngoMgqibelo kuthi ele Sundowns linqobe ele Vasco Da Gama nge 1 ka nya.
Umdlalo we final uzaqhutshelwa endaweni ye Port Elizabeth.
.....................................................................................................................................................................................................................................................................................................
Sikhangele umdlalo wokugijima;
Lonyaka inani labadlali abazaphatheka kumjaho we Coca-Cola Four Minute Challenge oqhutshelwa endaweni ye Zimbabwe International Trade Fair Showgrounds minyaka yonke liphunguliwe kuyindlela yokuzama ukukhuphula izinga lomncintiswano.
Inkokheli ze Bulawayo Athletics Association zithi phakathi kwabadlali bonke abaphumelele kunhlelo zokudinga abadlali abatshengisa ithemba lokuba bengagijima amahlandla amane ngesikhathi esingaphansi kwemizuzu emine kuzakhethwa abalitshumi lantathu kuhlelo oluzaqhutshelwa esikolo se Gifford High ngoLwesihlanu kuthi labo abazaphumelela yibo abazancintisana ngoMgqibelo ku final.
Nyakenye owanqoba kulumncintiswano ngu Wellington Varevi oweqembu le Blanket Mine.