amalinks wokungena

Breaking News

I-Chicken Inn Iqhubeka Idlala Kuhle kuPSL


Uphawo lweqembu lenguqu ele Chicken Inn
Uphawo lweqembu lenguqu ele Chicken Inn

Iqembu lomdlalo wenguqu ele Chicken Inn liqhubekele phambili lidlala kuhle emidlalweni yesigaba se Premier Soccer League phambilini kwekhefu lamaviki amabili kudedelwa imidlalo yeqembu lesizwe.

Iqembu le Chicken Inn selilemiklomelo engamatshumi amabili lathoba munwe munye (29) ngemva kokunqoba elikwenze ele Chapungu ngoMgqibelo enkundleni ye Ascot.

Lokhu kutsho ukuba leliqembu likhokhela iqembu elihlezi kundawo yesibili ele Triangle ngemiklomelo emihlanu njengoba ele Triangle lile miklomelo engamatshumi amabili lane ngemva kokunqoba ele Tsholotsho nge 3 ka 1 ngeSonto.

Kundawo yesithathu kuleqembu le Dynamos lona eliyehluleka ukunqoba kulezinsuku njalo lilemiklomelo engamatshumi amabili lantathu ngemva kokuba ngutshiki lobhanqa 1 ka 1 lele ZPC Kariba.

Iqembu le How Mine lihlezi kundawo yesine lilemiklomelo engamatshumi amabili lambili ngemva kokuba ngutshiki lobhanqa 1 ka 1 leqembu le Highlanders.

Kundawo yesihlanu kuleqembu leChapungu elilemiklomelo engamatshumi amabili lanye kuthi kundawo yesithupha kuleqembu le Harare City lona elilengene ngemiklomelo leqembu le Caps United womabili elemiklomelo engamatshumi amabili.

Kundawo yethobaminwe mbili kuleqembu le Highlanders elilemiklomelo elitshumi lathoba munwe munye kuthi ngemva kwalo kuleqembu le FC Platinum elilemiklomelo elitshumi lathoba minwe mbili.

Iqembu le ZPC Kariba likundawo yetshumi lilemiklomelo elitshumi lanhlanu njalo lilingene ngemiklomelo leqembu le Buffaloes.

Kundawo yetshumi lambili kuleqembu le Hwange elilemiklomelo elitshumi lane ngemva kwalo kuleqembu le Whawha elilemiklomelo elitshumi lanye.

Iqembu le Tsholotsho lisendaweni ye tshumi lane lilemiklomelo elitshumi njalo lilingene ngemiklomelo leqembu le Flame Lily elikundawo yetshumi lanhlanu.

Iqembu elisemsileni ngele Dongo Sawmills elilemiklomelo eyisikhombisa.

Imidlalo ye ligi izahlaba ikhefu lamaviki amabili kudedelwa imidlalo yeqembu lesizwe lona elizaphatheka kumidlalo yokudinga intshantshu zezwekazi lase Africa.

Ngempelaviki ezayo iqembu le Zimbabwe lizadlala lele Malawi kumncintiswano we Afcon kuthi ngempelaviki ezalandela lapho lizaphatheka kumkhankaso we Chan.

.............................

Kolunye udaba olumayelana lomdlalo wenguqu iqembu le Barcelona yilo eliphakamise inkezo ye Uefa Champions league ngemva kokunqoba ele Juventus nge 3 ka 1 ngoMgqibelo.

Limpumela itsho ukuba iqembu le Barcelona seliyiphakamise kahlanu kumbali yalo linkezo ye Champions League njalo umqeqetshi waleliqembu uLuis Enrique uphakamise inkezo ezintathu kumnyaka wakhe wakuqala eqeqetsha iqembu leBarcelona ngemva kokuba leliqembu liphakamise lenkezo yeligi kanye leyenkezo enkulu elizweni le Spain.

...............................................

Sikhangele umdlalo wokugijima;

Abadlali abathi uOlivia Chitate kanye lo Elijah Mabhunu yibo abanqobe kumncintiswano we Old Mutual Nkulumane 10 km Fun Run oqhutshelwe elokitshini le Nkulumane ngeSonto ekuseni.

Bobabili laba bathole inkulungwane eyodwa yamadola asemelika ngamunye.

Ngokwesithathu iminyaka ilandelana ukuba uChitate anqobe kulumncintiswano.

UGeorge Majaji nguye oqede ekundawo yesibili kucele labesilisa kuthi kucele labesifazane oqede ekundawo yesibili nguConstance Nyasango.

XS
SM
MD
LG