Uzulu seveze imbono etshiyeneyo phezu komthetho ozabamba abafundi abakuO' Level kuqala ngomnyaka ozayo ukuthi bayesebenza emankampanini atshiyeneyo bengakadluleli phambili kuzifundo zeA' Level.
Uhulumende uthi bonke abafundi beO' Level bazamele bayesebenza emankampanini okwenyanga ezinhlanu ukuze baye kuA' Level.
Abangaqhubanga izifundo lezi, ezaziwa ngesingisi ngokuthi yiAttachment, kabasoze baye ku A' Level. Abasola loluhlelo bagoqela abafundi, abazali lababalisi.
Umphathintambo wezemfundo yaphezulu uMnu Jonathan Moyo laye uyalusola loluhlelo esithi abafundi bemakolishini lemaUniversity yibo abamele benze ama-attachment, hatshi abantwana abenza iO' Level.
Kodwa isiphathamandla senhlanganiso yabafundi iZinasu uMnu Alister Pfunye yena uthi vumelana lomqondo lo.
Lanxa kunjalo, uthi kaboni uphumelela ngoba kungela mankampani lapho abafundi abangenza khona ama attachments abo.
"Lo ngumbono omuhle kakhulu kodwa inkinga yikuthi indawo zokwenzela izifundo lezi ziyasilela," kutsho uPfunye.
Umzali uMnu Difa Dube yena uthi kavumelani lakancane lombono kahulumende lo.
"Zinengi izinto ezimqoka uhulumende amele ukuthi ngabe uyazigijimisa, hatshi indaba yama-attachments le," kutsho uDube.