Amalunga edale lephalamende asole iziphathamandla zikahulumende esithi inengi lazo lihambisa abantwana ezikolo ezizimeleyo kumbe ezingaphandle kwelizwe yikho zingalwazi lonke uhlupho oluphathelane lezikolo zikahulumende.
Lokhu kuvezwe lapho kuvulwa idale lephalamende ngoMvulo, lona ebelivaliwe okwamaviki amabili njengenhlalayenza, amalunga alelidale esathatha ikhefu.
UMnu. Settlement Chikwinya, omela iMbizo edale lephalamende ubikwa esekelwe ngabanengi lapho esithi ugatsha lukahulumende olubona ngezemfundo lwethula imithetho engajulisi inhlelo zemfundo, efana lokuvimba ukuthi ababalisi beqhube ezinye izifundo zama extra lessons ukwenzela ukuthi bethole imali yama incentives, ezabakhuthaza ukuthi besenze nzima abantwana bephumelele.
Ukuze sizwe okunengi okwenzakale edale lephalamende, sixoxe loNkosazana Thabitha Khumalo, omela iBulawayo East kulelidale.
