amalinks wokungena

Breaking News

I-Dynamos Ixotsha Umqeqetshi Wayo uMandigora


Iqembu lenguqu ele Dynamos FC
Iqembu lenguqu ele Dynamos FC

Iqembu lomdlalo wenguqu ele Dynamos selixotshe umqeqetshi uDavid Mandigora ngemva kokuba eyehluleke ukufeza izivumelwano azilobelana phansi lenkokheli yaleliqembu.

Isiphathamandla seqembu le Dynamos uKenny Mubaiwa uthi uMandigora uphelelwe ngumsebenzi ngoba sekusobala ukuba ngaphansi kwenkokheli yakhe leliqembu alingeke liphakamise isicoco seligi.

UMubaiwa uthi babevumelane lo Mandigora ukuba ngesikhathi ihlandla lakuqala lemidlalo ye PSL lifika emaphethelweni iqembu le Dynamos libe selibuthelele imiklomelo engamatshumi amathathu kodwa lokhu kwehlule.
UMandigora uqhatshwe ekuqaleni komnyaka ngemva kokutshiya umsebenzi okwenze uKallisto Pasuwa yena ophakamise inkezo yeligi okweminyaka emine ilandelana.

Kusenjalo iqembu le Dynamos lixegwe lele Whawha kumidlalo yehlandla lakuqala eyenkezo ye Chibuku Super Cup.

Amaqembu ahlezi kuzindawo eziyithoba minwe mbili eziphezulu engalaneni yemiklomelo axegwe lamaqembu akundawo eziyithoba minwe mbili ezingaphansi kwengalane njalo amaqembu azadlala ngokulandelayo.
Iqembu le Harare City lizadibana lele Buffaloes, iqembu le FC Platinum lizadlala lele Dongo Sawmills, iqembu le Chapungu lizadlephana leqembu le Flame Lily, iCaps United izadlala leqembu le ZPC Kariba, iqembu le How Mine lizatshayana leqembu le Highlanders, iqembu le Triangle lizadibana leqembu leTsholotsho kuthi iqembu le Chicken Inn lizangqikilana leqembu le Hwange.

Limidlalo ikhona ngempelaviki yamhla ziyithoba minwe mbili lamhla ziyithoba munwe munye kunyanga kaNcwabakazi.
.........................................................
Kolunye udaba olumayelana lomdlalo wenguqu iqembu lamajaha aleminyaka engaphansi kwamatshumi amathathu elimela ilizwe emdlalweni wenguqu liphakame namhla libhekise amabombo kwele South Africa lapho elikhangelelwe ukudlala lelabosowabo elimela ilizwe le South Africa.

Iqembu elizaphumelela kulumdlalo yilo elizathola ilungelo lokuyaphatheka kumidlalo ye African Championships ekupheleni komnyaka.

Lawa maqembu ake adibana kumaviki amabili adlulileyo njalo lowo mdlalo uphele zingutshiki lobhanqa 1 ka 1 okutsho ukuba iqembu le Zimbabwe kuzamele linqobe kumbe umdlalo uphele zingutshiki lobhanqa ngemiklomelo emibili loba eyedlula lapho.
.....................................................
Sikhangele umdlalo kakhilikithi;
Iqembu elimela ilizwe emdlalweni kakhilikithi lizadibana leqembu elimela ilizwe le New Zealand ngeSonto kumdlalo wakuqala owohlobo lwe One Day International ozakuba senkundleni ye Harare Sports Club.

Lawa maqembu azadibana kweminye imidlalo emibili efanayo mhla zine lamhla ziyisikhombisa kunyanga kaNcwabakazi kuthi ngemva kwalokho azadlala umdlalo owodwa owohlobo lwe Twenty20 mhla ziyithoba munwe munye kuyo inyanga kaNcwabakazi njalo.

XS
SM
MD
LG