Iqembu lomdlalo wenguqu ele Dynamos selikhokhela ngomklomelo owodwa phezu kwengalane yemiklomelo ngemva kokuba lehluleke ukunqoba ele Bantu Rovers ngeNsonto kwathi iqembu elincintisana lalo ukuphakamisa isicoco salonyaka ese PSL ele ZPC Hwange lona lanqoba ele Harare City ngoMgqibelo.
Iqembu leli lilemiklomelo engamatshumi amahlanu lane (54) kuthi ele ZPC Kariba lilemiklomelo engamatshumi amahlanu lantathu (53) kusele imidlalo emibili ukuba imidlalo yalonyaka kusigaba se PSL ifike komlindi uyacina.
Lawamaqembu ayadibana emdlalweni olandelayo okuyiwo okhangelelwe ukuba utshengise ukuba inkezo yePSL iyathathwa yiliphi iqembu lonyaka kuthi emidlalweni eyokugqiba imidlalo yeligi iDynamos izadlala leqembu le How Mine kuthi iqembu le ZPC Kariba lona lizadlala lele CAPS United.
Iqembu le Caps United likundawo yesithathu engalaneni lilemiklomelo engamatshumi amane lethoba munwe munye (49).
Kundawo yesine kuleqembu le FC Platinum lona elilemiklomelo engamatshumi amane lanhlanu kuthi kundawo yesihlanu kuleqembu le Hwange lona elilemiklomelo engamatshumi amane lambili njalo lilingene ngemiklomelo leqembu le Highlanders lona elinqobe ele Chiredzi nge 2 ka 1 enkundleni ye Hartsfield namhla emini.
Amaqembu azaqeda imidlalo yalonyaka ehlezi kundawo ezine eziphezu kwengalane yiwo azaphatheka kumncintiswano walonyaka owenkezo ye Mbada Diamonds Cup.
Ngaphansi kwengalane amaqembu osekusaziwa ukuba azabe edlala kusigaba sika Division One ngomnyaka ozayo ngathi iqembu le Chiredzi kanye leqembu le Bantu Rovers.
Amanye amabili azagunyulwa azaphuma phakathi kwamaqembu agoqela iShabanie Mine, iBlack Rhinos, iHarare City, iTriangle, iChapungu, iBuffaloes kanye le How Mine.
******************************
Sikhangele umdlalo wenguqu kwamanye amazwe;
Akuzange kube lemidlalo yenguqu esigabeni se PSL laku National First Division elizweni le South Africa ngempelaviki edluleyo kuyindlela yokuhlonipha umuyi owayengunozinti weqembu le Orlando Pirates kanye leqembu lesizwe ele Bafana Bafana uSenzo Meyiwa yena ongcwatshwe ngoMgqibelo ekhaya kubo KwaZulu.
UMeyiwa obeleminyaka engamatshumi amabili lesikhombisa eyokuzalwa ubhubhe ekupheleni kwenyanga edluleyo ngemva kokudutshulwa yizigebengu elokitshini leVoslorus khonale eSouth Africa.
Ngase Ngilandi iqembu le Chelsea lihlezi phezu kwengalane lilemiklomelo engamatshumi amabili lesithupha ngemva kokudlala imidlalo elitshumi kuthi ngemva kwalo kuleqembu le Southampton elilemiklomelo engamatshumi amabili lambili ikanti intshantshu sezini edluleyo iqembu le Manchester City lihlezi kundawo yesithathu lilemiklomelo engamatshumi amabili ngemva kokunqoba ele Manchester United ngeNsonto.
Elizweni le Spain iqembu le Real Madrid lihluthune ubukhokheli bengalane yemiklomelo ngemva kokuba linqobe ele Granada nge 4 ka nya ngoMgqibelo kwathi lelo ebelikhokhela phambilini kwemidlalo yangempelaviki ele Barcelona latshaywa nge 1 ka nya ngele Celta Vigo.
**********************
Iqembu elimela ilizwe leZimbabwe emdlalweni kakhilikithi likhangelelwe ukuqhuba ngcono emdlalweni wesibili owohlobo lwe test eliwudlala leqembu elimela ilizwe lase Bangladesh oqale edolobheni le Khulna khonale elizweni le Bangladesh namhla ekuseni.
IZimbabwe inqotshwe ngama wicket amathathu emdlalweni wakuqala obekhona ngeviki edluleyo njalo kumele lenqabele ukunqotshwa kulumdlalo wesibili ukuze liyale lilokhu lilethuba lokunqoba kumidlalo emibili phakathi kwemithathu eyohlobo lwe Test.