Iqembu lenguqu elemela eleGermany linqobe kumncintiswano wezizwe zomhlaba emidlalweni kanobhutshuzwayo ebiqhutshelwa kwele Brazil ngemva kokunqoba elikwenze ele Argentina ku final yenkezo ye2014 World Cup nge 1 ka nya ngeNsonto.
IGermany iphakamise inkezo yezizwe zomhlaba okwesine selokhu kwaqalwa ukudlalwa imidlalo yezizwe zomhlaba ngokunqoba ekwenze iArgentina ngeNsonto.
Umdlali weqembu le Germany uMario Gotze ulitshayele emambuleni sekusele imizuzu eyisikhombisa ukuba kuphele imizuzu engamatshumi amathathu ebingezelelwe ngoba lawa maqembu etholakale elokhu engutshiki lobhanqa ekupheleni kwemizuzu engamatshumi ayithobamunwe munye.
Limpumela itsho ukuba iGermany ibe lilizwe lakuqala elikuzwekazi le Europe ukunqoba kumidlalo yezizwe zomhlaba eqhutshelwe kuzwekazi le South America.
Ukunqoba kweGermany ngeNsonto kulandela ukunqoba kwayo kumncintiswano eyaba khona ngo 1954, 1974 kanye lo 1990.
Umklomelo kaGotze udale ukuba inani lemiklomelo ehlohlwe lonyaka lilingane laleyo eyahlohlwa kumidlalo eyadlalelwa eFrance ngo 1998 lakho okwahlohlwa khona imiklomelo elikhulu elilamatshumi ayisikhombisa lowodwa (171).
Unozinti weqembu le Germany uManuel Neuer nguye okhethwe ukuba ngunozinti obambe ukwedlula abanye kuthi umgadli we Argentina uLionel Messi nguye okhethwe ukuba ngumdlali waphakathi kwenkundla odlale okwedlula abanye ikanti umgadli weColombia uJames Rodriguez nguye ohlohle okwedlula abanye abadlali ngemva kokulitshayela emambuleni kasithupha.
Iqembu leColombia yilo eliphiwe imendulo eyokuba lembeko kumidlalo yalonyaka.
INetherlands iqede umncintiswano walonyaka ikundawo yesithathu ngemva kokunqoba iBrazil ngoMgqibelo kuthi iBrazil ithe ngokudliwa lokhu yaphutsha ikundawo yesine njalo umqeqetshi waleliqembu uFelipe Scolari uhle waxotshwa umsebenzi.
Kolunye udaba olumayelana lomdlalo wenguqu iqembu le Highlanders selikhokhela ngemiklomelo emithathu phezu kwengalane yemiklomelo kusigaba se Castle Premier Soccer League ngemva kwemidlalo ebikhona ngempelaviki.
IHighlanders ikhuphule inani layo lemiklomelo laya kumatshumi amathathu ngemva kokunqoba elikwenze iqembu le Bantu Rovers emagumeni.
Amaqembu alandela ngemva kweBosso athi intshantshu zanyakenye iqembu le Dynamos kanye le CAPS United aphazamisene emdlalweni obusesigodlweni lapho abe ngutshiki lobhanqa okutsho ukuba athole umklomelo owodwa ngalinye njalo womabili alemiklomelo engamatshumi amabili lesikhombisa ndawonye leqembu elihlezi kundawo yesibili eleZPC Kariba.
Kundawo yesihlanu kuleqembu le Hwange elilemiklomelo engamatshumi amabili lantathu njalo lilingene lamaqembu athi iChicken Inn kanye le Buffaloes.
Iqembu le FC Platinum lihlezi kundawo yethoba minwe mbili lilemiklomelo engamatshumi amabili lambili njalo lilingene ngemiklomelo leqembu le How Mine.
Kundawo yetshumi kuleqembu le Shabanie Mine elilemiklomelo elitshumi lathoba munwe munye kuthi ngaphansi kwalo kuleqembu le Triangle elilemiklomelo elitshumi lesikhombisa lona lilandelwa ngele Chapungu elilemiklomelo elitshumi lesithupha.
Endaweni ezine ezingaphansi kwengalane kutholakala amaqembu athi iBlack Rhinos, iBantu Rovers, iHarare City kanye le Chiredzi.
Sikhangele umdlalo kakhilikithi;
Iqembu elimela ilizwe leAfghanistan emdlalweni kakhilikithi lisedolobheni lakoBulawayo ukuzodlala imidlalo emine eyohlobo lwe One Day International ezaqala ngoLwesihlanu enkundleni ye Queens Sports Club.
NgeNsonto leliqembu liphatheke emdlalweni wokuzwana amandla lele Zimbabwe A lanqoba ngama runs alitshumi lesithupha njalo lawamaqembu azadibana njalo komunye umdlalo ofanayo kusasa phambilini kokuba kuqale imidlalo yama ODI ngoLwesihlanu.
Ngemva kwaleyo midlalo amaqembu azakuya esigodlweni iHarare lapho azadlala imidlalo emibili eyohlobo lwedlalwa phakathi kwamalanga amane enkundleni ye Country Club.