amalinks wokungena

Breaking News

Izinto Zibikwa Zingamanga Kuhle kuHighlanders Nanku Selihlamukelwe Ngabalandeli


Highlanders
Highlanders

Emdlalweni wePremier Soccer League odlalwe ngoMvulo iqembu leHwange libe ngutshiki lobhanqa 0-0 leleBantu Rovers emdlalweni obuseHartfield koBulawayo. Lokhu kutsho ukuba iHwange izaqhubeka ihleli endaweni yesihlanu kungalane yemiklomelo.

Ngakwelinye icele kubikwa sekutsheke ibhetshu kuqembu lomdlalo wenguqu ele Highlanders lona elihlamukelwe ngabalandeli balo ngeNsonto bavalela abadlali labaqeqetshi phakathi kwenkundla ekupheleni komdlalo we Bosso le ZPC Kariba.

Ukunqotshwa okwenziwe iqembu le Highlanders ngele ZPC Kariba nge 3 ka 1 enkundleni ye Hartsfield kuhle kwabhoboza ithumba ebelihlezi lifuthela abalandeli balo kwathi ekupheleni komdlalo bahlasela abadlali bephosela amatshe lamambodlela enkundleni.

Lokhu kuhlasela kutshiye umfana oleminyaka elitshumi lantathu obedobha amabhola enkundleni elimele ekhanda ikanti lomdlali weqembu le ZPC uTawanda Nyamandwe laye elimele ebusweni.

Kuthe lalapho amapholisa esenelise ukuchitha labo abakade bephosela okutshiyeneyo enkundleni amaqembu aya emakamelweni okuntshintshela impahla kwathatha isikhathi esedlula ihola ukuba umqeqetshi weqembu le Highlanders aphume azokhuluma lentatheli.

Ekuphumeni kwakhe ke uKaindu uthe akasoze alahle imbeleko ngokufelwa njalo ulethema lokuba iqembu lakhe lingaphakamisa isicoco seligi ekupheleni komnyaka.

Lokhu kuzakuba nzima kodwa njengoba iqembu le Dynamos selikhokhela ele Highlanders ngemiklomelo eyisikhombisa kusele imidlalo eyisithupha ukuba isizini ifike komlindi uyacina.

IDeMbare ilemiklomelo engamatshumi amane lesithupha (46) njalo litshiya iqembu le ZPC Kariba elihlezi kundawo yesibili ngemiklomelo emibili kuthi iqembu le CAPS United lona elihlezi kundawo yesithathu lilemiklomelo engamatshumi amane lambili.

Sikhangele umdlalo kakhilikithi; iqembu le Zimbabwe A linqobe ele Bangladesh A ngama runs alitshumi lesikhombisa emdlalweni wakuqala owohlobo lodlalwa ngosuku olulodwa khonale elizweni le Bangladesh ngeNsonto.

Lokhu ngokwakuqala ukunqoba kwaleliqembu selokhu lifike eBangladesh njengoba linqotshwe emidlalweni emibili eyehlobo lweTest.

Umdlali we Zimbabwe uRegis Chakabva nguye odlale indima enkulu ekunqobeni kweqembu leli ngomva kokuthola ama runs edlula ikhulu okungokwakuqala ukuba akwenze edlalela iqembu lesizwe.

Lawa maqembu azadibana njalo kusasa ngoLwesibili aphinde angqikilane futhi langoLwesithathu.

Iqembu elimela ilizwe le Zimbabwe emdlalweni we golf liselizweni lase Zambia lapho eliyephatheka khona kumncintiswano wakuqala owe Africa Golf Confederation President’s Cup oqala kusasa ngoLwesibili edolobheni le Kitwe.

Kulamazwe alitshumi lanye angene kulumncintiswano wona ozafika emaphethelweni ngoMgqibelo njalo ilizwe le Zimbabwe limelwe ngabadlali abathi uThembelani Vundla, uVisitor Mapwanya, uRobson Chinhoi kanye lokaputeni weqembu uTonderai Masunga.

Umqeqetshi weqembu ngu Roger Baylis njalo leliqembu likhangelelwe ukwenza kuhle njengoba ilizwe le South Africa okuyilo elilabadlali bezinga laphezulu lingaphatheki kulumncintiswano.

Amanye amazwe akhangelelwe ukuba khona kulumncintiswano ngagoqela iNamibia, Malawi, Uganda, Tanzania, Kenya, Tunisia, Mauritius, Mozambique, Botswana kanye layo iZambia njengabaqoqi bemidlalo yakhona.

XS
SM
MD
LG