amalinks wokungena

Breaking News

IHighlanders Ikhwela Kungalane Yemiklomelo yePSL


Iqembu le Highlanders likhuphuke layahlala kungxenye yangaphezulu kwengalaneni yemiklomelo kusigaba se Premier Soccer League ngemva kokubhaxabula ele How Mine nge 5 ka 1 ngeSonto enkundleni ye Barbourfields.
Livuke eseganga iqembu le Highlanders ngeSonto latshaya ele How Mine nge 5 ka 1 okuyimpumela edale ukuba likhuphuke liyehlala kundawo yethoba minwe mbili engalaneni yemiklomelo.

Limpumela iqume umlomo umqeqetshi weqembu le How Mine uLuke Masomere yena obechothoze iqembu le Highlanders phambilini kwalumdlalo ethi lincediswa ngabonompembe.

Ngaphezu kwengalane kuhlezi iqembu le Chicken Inn lona elithe ngokunqoba ele Chapungu nge 2 ka nya ngoMgqibelo lakhuphula inani lalo lemiklomelo laba ngamatshumi amathathu lesikhombisa (37) ngemva kokudlala imidlalo elitshumi lathoba minwe mbili.

Kundawo yesibili kuleqembu le Triangle elilemiklomelo engamatshumi amathathu lanhlanu (35) ngemva kokunqoba kwalo ele Tsholotsho nge 2 ka nya ngoMgqibelo njalo.

please wait

No media source currently available

0:00 0:03:48 0:00
Lapho esitholakala khona



Iqembu le Dynamos lihlezi kundawo yesithathu lilemiklomelo engamatshumi amathathu lambili (32) kuthi ngaphansi kwalo endaweni yesine kuleqembu le FC Platinum elilemiklomelo engamatshumi amathathu lanye (31).
Kundawo yesihlanu kuleqembu le Harare City elilemiklomelo engamatshumi amabili lathoba munwe munye (29) njalo lilingene ngemiklomelo leqembu le How Mine elikundawo yesithupha.
Iqembu le Caps United lona elilemiklomelo engamatshumi amabili lathoba minwe mbili (28) lihlezi kundawo yesikhombisa njalo lilandelwa ngele Highlanders elilemiklomelo engamatshumi amabili lanhlanu (25).


Kungxenye yangaphansi yengalane yemiklomelo iqembu elihlezi kundawo yethoba munwe munye ngele Chapungu elilemiklomelo engamatshumi amabili lane (24).


Kundawo yetshumi kuhlezi iqembu le Hwange elilemiklomelo elitshumi lathoba munwe munye (19) kuthi ngemva kwalo kutholakala iqembu le Buffaloes elilemiklomelo elitshumi lesikhombisa (17).


Iqembu le ZPC Kariba lihlezi kundawo yetshumi lambili lilemiklomelo elitshumi lesithupha (16) njalo lilingene ngemiklomelo leqembu le Tsholotsho elihlezi ngaphansi kwalo.


Kundawo yesithathu nxa usuka emsileni wengalane kuleqembu le Whawha elilemiklomelo elitshumi lanhlanu (15) kuthi ngaphansi kwalo kuleqembu le Flame Lily elilemiklomelo elitshumi lane (14).
Ngaphansi kwengalane kutholakala iqembu le Dongo Sawill lona elijeke amanye amaqembu lilemiklomelo elitshumi lambili (12).

Sikhangele impumela yomdlalo kanobhutshuzwayo edlalwe kwamanye amazwe; Elizweni le South Africa imidlalo yesigaba se semi final kumncintiswano we MTN8 phakathi kwamaqembu athi ele Ajax Cape Town lele Bidvest Wits kanye lobuphakathi kwe Bloemfontein Celtic leqembu le Kaizer Chiefs iphele zingutshiki lobhanqa 1 ka 1.


Lawa maqembu azadibana njalo ekupheleni kwenyanga kuhlandla lesibili njalo ngemva kwalimidlalo yikho okuzavela khona ukuba yiwaphi amaqembu azahlangana ku final.


NgaseNgilandi imidlalo yeligi ingene kuviki yesibili njalo phezu kwengalane kuhlezi iqembu le Manchester City lona elilemiklomelo eyisithupha ngemva kokutshaya ele Chelsea nge 3 ka nya ngeSonto.


Amanye amaqembu alemiklomelo eyisithupha ngagoqela ele Leicester City kanye lele Manchester United ikanti elinye elilakho ukuba lenani lelo ngele Liverpool lona elidlala lele Bournemouth namhla ntambama.


Elizweni le Spain iqembu le Atletico Bilbao lenze izimanga ngokutshaya ele Barcelona nge 4 ka nya kufinal eyenkezo ye Spanish Super Cup ngoLwesihlanu.


Ihlandla lesibili lalumdlalo likhona namhla ntambama njalo iqembu le Barcelona likhangelelwe ukudlalisa abadlali balo bonke elibathembileyo njengoba ngempelaviki edluleyo belidlalisa labo abangajwayelanga ukudlala.

Sikhangele umdlalo we rugby;
Iqembu elimela ilizwe le Zimbabwe emdlalweni we rugby libhaxabulwe nge 80 ka 6 ngele Namibia kumdlalo wokudinga intshantshu zezwekazi lase Africa.
Lumdlalo udlalelwe khonale kwele Namibia njalo limpumela ayimangalisi nxa kukhangelwa indlela iqembu le Zimbabwe elilungiselele ngayo njengoba lingenelisanga ukungena enkambeni lilonke kungenxa yokuswelakala kwemali.

XS
SM
MD
LG