Ezigabeni ezinengi zeZimbabwe ikakhulu ese Matabeleland, sibikwa sesisele lomumbu ongasoze wenelise ukufika iviki eyodwa osekubangele abagaya umumbu ukuze ube yimpuphu ukuthi bacele osaphethe isikhundla sikamongameli, uMnu. Phelekezela Mphoko ukuthi acele umphathintambo wezokulima ukuthi abavumele ukuthenga umumbu phandle kwelizwe.
Umphathintambo wezokulima, uMnu. Joseph Made ubikwa wavimba ukuthengwa komumbu ngaphandle kwelizwe esithi uhulumende nguye yedwa omele enze lokhu.
Inhlanganiso ye Grain Millers’ Association of Zimbabwe ithi kwezinye izigaba zelizwe sekusele umumbu ongenelisa ukufika inyanga ezimbili kuphela.
Kodwa ngenyanga kaNtulikazi, uMade utshele intathelizindaba ukuthi ele Zimbabwe lizathenga umumbu oyisisindo sama thani azinkulungwane ezingamakhulu phose athoba minwembili-780,000 kwele Zambia okungenelisa ukuthi ilizwe lithole amabele kuze kuyefika isivuno somnyaka ozayo.
Kodwa ele Zambia lithi kalisathengiseli omakhelwane umumbu ngoba lalo lifuna ukugcina njnegoba kukhangelelwe ukuthi kuzaba lezulu elilutshwana lomnyaka.
Umkhokheli wenhlanganiso ye Grain Millers’ Association of Zimbabwe esigabeni se Matabeleland, uMnu. Thembinkosi Ndlovu utshele iStudio Seven ukuthi bakhangelele impendulo kaMphoko ngoba ilizwe lingangene endlaleni ensukwini ezinlutshana ezindelayo nxa kungasathathwanga amanyathelo.
“Umumbu lowana obuwodwa eZambia akusela,” kutsho uNdlovu. “Kungela kunjalo eGMB lakho basithele ukuthi umumbu umlutshwana kakhulu.”
