amalinks wokungena

Breaking News

Abesifazana Babuthana Belandisa Ngokwephulwa Kwelungelo Labo


ZLHR
ZLHR

Abesifazane abaphatheke emikhankasweni yokulwela ukulondolozwa kwamalungelo oluntu, bebelandisa phezu kokuhlukumezwa nguhulumende okhona ngesikhathi bekhankasela ukulondolozwa kwamalungelo oluntu lapho eleZimbabwe limanyana lamazwe womhlaba ukunanza usuku lokuqakathekisa imisebenzi yabesifazane, okwenziwa minyaka yonke mhla ziyisitshiyagalombili ngoMbimbitho olwe United Nations International Women’s Day.

Abesifazana balandise izehlakalo zokuhlukumezwa emkhosini oqoqwe ngabenhlanganiso yamagqwetha alwela ilungelo loluntu ye Zimbabwe Lawyers For Human Rights,owenzelwe e SAPES TRUST eHarare ngoLwesihlanu ekuseni.

Umgcinisihlalo we ZLHR unkosazana Prescious Chakasikwa utshele lumbuthano ongenwe zinkokheli zenhlanganiso ezehlukeneyo zokulondolozwa kwelungelo loluntu, uveze ukuba owesifazane ubhekane lenkinga eziphindiweyo lapho ephatheka kulemisebenzi lanxa kulilungelo lakhe njengaye wonke umuntu ukuba atsho lapho ilungelo lakhe lisephulwa.

Kwasekelwa ngumqondisi wayo linhlanganiso unkosazana Irene Petraz uthi akukho kulinganiswa kwamathuba phakathi kwabesifazane labesilisa elizweni, lanxa kungelilenotho enengi, okufuqa abesifazane ukuba baphethe sebesiya kwamanye amazwe ukuyadinga ukuziphilisa, abanye babo sebengabaziphilisa ngokuthengisa imizimba yabo.

Kuthi Unkosazana Beatrice Mthethwa yena ukhuthaza uhulumende ukuba asheshe ayilungisise imithetho ihambelanae lesisekelo esitsha sombuso sona esimumethe okunengi okulungelo ukulondoloza amalungelo abesifazane.

Ugogo uFelistus Chinyuku ngomunye wabahlukumezwa ngokudilizelwa umuzi ngoba ebikwa eyakhe endaweni engekho emthethweni kusukela ngesikhathi esese Porta Farm kuze kuyekuthi lapho ahlezi khona khathesi e Hopely.

Ugogo UChinyuku oleminyaka engamatshumi ayisithupha lanhlanu ( 65 ), ulandisele uzulu obe kulomkhosi, phezu kobuhlungu ahlalangana labo kuze kube khathesi ethi akayikubukhohlwa lanxa sewabaxolela kulolocuku abamenzela lona.

Omunye wenkokheli ehlezi ihulukumezwa kokuphela nguhulumende ngoba iphatheka kunhlelo zokulwela ilungelo loluntu, unkosazana Magodonga Mahlangu, utshengise kokukhathazeka ngendlela abahlukunyezwa ngayo.

Ngasikhathi sinye abesifazane laba basole inkulumo kamsekeli kamongameli, umnumzana Emmerson Munangagwa, ngolweSithathu edale lephalamende, ngesikhathi ebuzwa phezu kwesimo kudaba lokusilela kwempahla yokusebenzisa ngesikhathi owesifazane esesikhathini esentolongweni bethi impendulo yakhe itshengisa ukungamhloniphi owesifazana njalo kuyikweyisa ngoba kulilungelo lakhe owesifazane ukuba ayithole impahla sikhathi sonke.

Unkosazana Mahlangu, yena oseke wabhekana laloludubo lokuswela impahla yokusebenzisa ngesikhathi ebotshiwe,u yisole kakhulu linkulumo kamsekeli kamongameli.

Umqondisi we Radio Dialogue unkosikazi Debra Mabunda uthi loludaba olululazwa ngumnumzana Munangagwa ludaba oluqakathekileyo hatshi empilweni yowesifazane kuphela kodwa isizwe sonke.

Usole kakhulu linkulumo unkosikazi Mabunda ethi sesifikile isikhathi sokuba ziboniswe lezinkokheli ukuba omkhulu ngubani phathi kwabo lozulu, basukumele phezulu ukutshengisa ukukhonona kwabo ngendlela ezehlukeneyo.

Abe be ZLHR laba bathethe lelithuba ukuphawula okusemthethweni ugwalo olukhuluma phezu kosizo abalutholisa uzulu ikakhulu abesifazane abalwela ukulondolozwa kwelungelo loluntu eZimbabwe.

Lumkhosi kungeminye yemikhosi eqoqwe zinhlanganiso ezehlukeneyo elizweni lonke emikhosini yokwandulela ukunanzwa kwalolusuku lapho kuqakathekiswa khona abesifazane olwe International Women's Day oluzananzwa umhlaba wonke mhla ka 8 kuyonale inyanga kaMbimbitho.

Lonyaka leli langa linanzwa phansi kwesihloko esithi EMPOWERING WOMEN, EMPOWERING HUMANITY: FACE IT.

XS
SM
MD
LG