Imidlalo yabasakhulayo eye African Union Sports Council Region 5 Youth Games eqhutshelwa edolobheni lako Bulawayo ivulwe okusemthethweni ngeNsonto nguMongameli Robert Mugabe.
Ekhuluma emkhosini wokuphawula ngokusemthethweni imidlalo yabasakhulayo eye African Union Sports Council Region 5 Under – 20 Youth Games enkundleni ye Barbourfields ko Bulawayo, uMongameli Mugabe uxhwayise abasakhulayo ukuba betshiyane lomkhuba wokubhema izidakamizwa lokunatha.
UMugabe uqhubekele phambili wathi ezemidlalo ziyakha ubungane phakathi kwabantu abatshiyeneyo.
Umphathintambo wezemidlalo lamasiko uAndrew Langa yena uthe inkundla zemidlalo edolobheni lako Bulawayo zizasala zisemeni esihle kakhulu njengoba kubelokhuthuthukiswa kwenkundla ezitshiyeneyo lapho okudlalelwa khona imidlalo le yabasakhulayo.
Ngemva komkhosi wokuphawulwa ngokusemthethweni kwemidlalo kube lomdlalo wenguqu phakathi kweqembu lamankazana aleminyaka engaphansi kwelitshumi lesikhombisa elimela ilizwe le Zimbabwe lelabosowabo elimela ilizwe le South Africa wona ophele iqembu langekhaya libhaxabulwe nge 5 ka nya.
Obukele lumdlalo njalo engumgadli weqembu lesizwe elabesifazane eleMighty Warriors uRudo Neshamba uthi impumela yalumdlalo ikhomba ukuba iqembu lasekhaya kalilungiselelanga ngemfanelo.
Kuhle kwakhanya emdlalweni wakuqala owesibaya sika Group C wona ophele iqembu le Zimbabwe linqobe ele Namibia ukuba amantombazana asekhaya aqhuba nzima ngoba eqede nzima umdlalo imbangela kuyikuba iqembu leli libunjwe sekusele isikhathi esincane ukuba imidlalo iqale.
Eminye imidlalo ekhona kulimidlalo ngegoqela eyenqindi yona ese Large City Hall, iBasketball le Judo okudlalelwa eTrade Fair, itennis yona ese Bulawayo Athletic Club, inetball yona eqhutshelwa eWhite City ikanti kusasa enkundleni ye White City kukhangelelwe ukuba imidlalo yokugijima yona ebimiswe yikuba inkundla ibingakapheli ukulungiswa iqale.
.............................................................................................................................................................................................................
Sikhangele umdlalo wenguqu kwamanye amazwe;
Elizweni le South Africa iqembu le Kaizer Chiefs lihlezi phezu kwengalane lilemiklomelo engamatshumi amathathu lesithupha ngemva kokudlala imidlalo elitshumi lane.
IChiefs inqobe iqembu le Orlando Pirates nge 2 ka nya ngoMgqibelo kwathi iqembu le Mamelodi Sundowns lithe ngokutshaya ele Free State Stars nge 2 ka nya layahlala kundawo yesibili lilemiklomelo engamatshumi amabili lantathu kodwa lona selidlale imidlalo elitshumi lantathu.
Elizweni leNgilandi iqembu elihlezi phezulu kwengalane ele Chelsea linqotshwe okwakuqala kulisizini lapho lidliwa ngele Newcastle nge 1 ka nya ngoMgqibelo.
Limpumela idale ukuba iChelsea yale ilemiklomelo engamatshumi amathathu lesithupha okutsho ukuba ikhokhela intshantshu zanyakenye iqembu le Manchester City ngemiklomelo emithathu ngemva kwemidlalo elitshumi lanhlanu.
Ngase Spain iqembu le Real Madrid yilo elihlezi phezu kwengalane lilemiklomelo engamatshumi amathathu lesithupha kuthi ngemva kwalo kuleqembu le Barcelona elilemiklomelo engamatshumi amathathu lane ngemva kwemidlalo elitshumi lane.
Kusenjalo, ingcwethi ecubungula ezombusazwe uMuziwethu Hadebe uthi eleZimbabwe selihle lathola imendulo yegolide emidlalweni ye African Union Sports Region V Under-20 Youth Games emdlalweni owokukhabana owe Judo ngoba elinye iqembu obekumele lincintisane lelizwe lingabuyanga kulimidlalo uHadebe, obekule imidlalo, uthi eleZimbabwe linqobe eleSwaziland 3-1 kumdlalo wenguqu ngoMvulo.
