amalinks wokungena

Breaking News

EleZimbabwe Lithi Liqhube Kuhle Imidlalo YeAU Sports Council Region V. Games


Umphathintambo wezemidlalo uMnu.Andrew Langa
Umphathintambo wezemidlalo uMnu.Andrew Langa

UMnu. Andrew Langa uthi abadlali beZimbabwe batshengisele ukuthi bazadlala kuhle emidlalweni efanayo eAngola ngomnyaka ka2016.

Abahlali bedolobho lako Bulawayo basele sebelesizungu ngemva kokufika emaphethelweni kwemidlalo yabasakhulayo eye African Union Sports Council Region Five ngeNsonto.

Limidlalo esungulwe mhla zinhlanu kuyonale inyanga ka Mpalakazi ibidlalelwa enkundleni ezehlukeneyo edolobheni lako Bulawayo njalo ibingenwa mathupha.

Lokhu kudale ukuba abantu abanengi, ngitsho lasibi salabo abakade bengazake belugxobe enkundleni zemidlalo, bavakatshele enkundleni ezitshiyeneyo besiyazilibazisa.

Umhlali we lokitshi le Pumula uCaroline Masowe utshele lumsakazo ukuthi ukholise kakhulu ngensuku ezedluleyo.

Ilizwe le Zimbabwe liqede imidlalo lihlezi endaweni yesibili engalaneni yemiklomelo lilemendulo ezingamatshumi ayithoba munwe munye lantathu ikanti endaweni yakuqala bekuhlezi iqembu le South Africa elibe lemendulo ezilikhulu elilamatshumi amabili lanye.

Endaweni yesithathu kubelelizwe le Angola lona elithole imendulo ezingamatshumi amabili.

Abaqoqi balimidlalo bathe limidlalo iphumelele kakhulu loba nje kube lokuphazamiseka kancane ekuphutsheni amalungiselelo lapha lalaphaya okudale ukuba umncintiswano wokugijima uphuze ukuqala kungoba indawo yokugijimela ibingakapheli ukulungiswa ikanti lenkundla ye Basketball ethwalekayo layo ifike elizweni sekulensuku ezimbili imidlalo iqalile.

Ilizwe le Angola yilo elizaqoqa limidlalo ngomnyaka ka 2016.

Sikhangele umdlalo wenguqu;

Ukukhethwa kwabadlali beqembu le ZPC Kariba abathathu ukuba yibo abadlali abadlale ukwedlula abanye bonke kusizini ye Castle Premier Soccer League lonyaka sekudale impikiswano phakathi kwabalandeli bomdlalo wenguqu elizweni.

Imvimbi ye ZPC uDennis Dauda nguye owetheswe inkatha yokuba ngumdlali odlale wancinta abanye bonke lonyaka iSoccer Star of the Year kuthi unozinti weqembu elifanayo uTendai Hove utholakala endaweni yesibili kuthi endaweni yesithathu kulomgadli weqembu le ZPC uLimited Chikafa.

Phezu kwabadlali laba umqeqetshi weqembu le ZPC Kariba lona ebelidlala kusizini yalo yakuqala kusigaba saphezulu uSaul Chaminuka nguye okhethwe ukuba ngumqeqetshu osebenze kuhle okwedlula abanye bonke.

Limpumela ayithokozisanga abanengi abathanda iqembu le Dynamos okugoqela lentatheli ezisebenza zisesigodlweni abathi umqeqetshi weqembu le Dynamos uKallisto Pasuwa bekumele kube nguye ogcotshwa ukuba ngumqeqetshi oncinte abanye ngemva kokuphakamisa inkezo yeligi okwesine phakathi kweminyaka emine njalo.

Abagadli abathi uCharles Sibanda kanye lo Kuda Musharu babelane umvuzo yokuba yibo abahlohle kanengi lonyaka ngemva kokulitshayela emambuleni okulitshumi lambili kuthi umdlali osakhulayo odlale kuhle kulabanye nguBlessing Moyo oweqembu leDynamos.

Unompembe othole isicoco sokuba nguye osebenze kuhle lonyaka ngu Brighton Chimene kuthi abanye abathole imivuzo ngu Salani Ncube lo Stella Ruvinga.

Iqembu le FC Platinum lona yilo elithole umvuzo wokuziphatha kuhle kuwo wonke amaqembu adlala kusigaba saphezulu.

Sikhangele umdlalo wenguqu kwamanye amazwe;

Uhlelo lokuba amaqembu azadlala njani kusigaba se knockout kumncintiswano we UEFA Champions League selwenziwe njalo amaqembu azadlala ngokulandelayo;

Iqembu le Paris St Germain lizadlala lele Chelsea, iqembu le Manchester City lizadibana lele Barcelona, iBayer Leverkusen lizangqikilana lele Atletico Madrid, iqembu le Juventus lizadlala lele Borrusia Dortmund, iSchalke izadibana le Real Madrid, iShakhtar Donetsk izadlala le Bayern Munich luthi iqembu le Arsenal lizadlala lele Monaco ikanti iBasel izahlangana leqembu le Porto.

Kusenjalo, umphathintambo wezemidlalo uMnu. Andrew Langa utshele uSithandekile Mhlanga weStudio 7 ukuthi eleZimbabwe liphumelele ukuphatha kuhle izethekeli ebezivela emazweni alitshumi kule imidlalo, njalo abadlali beZimbabwe batshengisele ukuthi bazadlala kuhle emidlalweni efanayo ezaqhutshelwa eAngola ngomnyaka ka 2016.

please wait

No media source currently available

0:00 0:02:08 0:00
Lapho esitholakala khona

XS
SM
MD
LG