Lokhe kungela nguquko ezwayo ekutholiseni uzulu imisebenzi eZimbabwe kungenani lempumela yenhlolisiso yeCentral Statistical Office ethi imisebenzi yokulima leyokuphila ngokuthengisa sokwenze udubo lokusilela kwemisebenzi lube nganeno elizweni.
Inhlolisiso ye Zimstat Labour Survey yanyakenye ithi inengi labasakhulayo abaphakathi kweminyaka elitshumi lanhlanu kusiya kumatshumi amathathu lane sebephila ngokuzenzela njalo bethathela phezulu lemisebenzi yokulima osokubafaka kusimo esihle sikhangela udubo lokusilela kwemisebenzi eZimbabwe.
Umnumzana Trust Nhubu wenhlanganiso ye Youth Agenda Trust uthi inhlolisiso enje iyenga abantu ngendlela engaguquli isimo sendubo ezikhona elizweni.
Inhlanganiso ye Zimbabwe Statistical Office ithi umumo wokusilela kwemisebenzi kuleli ungaba ukubanga letshumi kusiya kutshumi lanye ekhulwini ngoba abantu abanengi sebephatheka kumisebenzi yokuziphilisa ku informal sector hatshi kusimo sokungamatshumi athobaminwembili okutshiwo ngabanye.
Kodwa umqondisi we Youth Agenda Trust umnumzana Lawrence Mashungu uthi loludubo lokhe lubhahile kuleli njalo lukhathaza abasakhulayo ngokwengezelelweyo kutshiyana lalokho okuphuma kulinhlolisiso.
Uthi nxa kuliqiniso lokuba abantu sebephila kuhle ngokuzenzela kungani abantu abanengi kangaka besiya emazweni afana le zansi ye Africa nsuku zonke baze bale lokuphenduka ekhaya bekhangelane lodubo lokuhlukuluzwa lokubulawa kudlakela lokucasana ngemihlobo olwe Xenophobia kulelo lizwe bekhetha ukufa kanje kulokubulawa yindlala e Zimbabwe.
Ingcitshi kwezomnotho umnumzana John Robertson utshele lumsakazo ukuba impumela enje ayiphathisi njalo ingemukeleki ngoba uhulumende eseguqula udaba lokuba ukuqatshwa kutshoni ilinganisa ukuqatshwa lokuphila ngokuzamazama umuntu eziphandela ethi ukusilela kwemisebenzi lokhe kukusimo esibi kungela nguquko ngoba umsebenzi umele umuntu eqatshwe ethola iholo, I payslip engenza ukuba avule ama account ethole njalo izinto ezifana le medical aid engamphathisa lemhuli yakhe kunye le pension elakho njalo ukuthuthukisa ulwazi lomsebenzi wakhe ethi abantu bonke laba abaphila ngokuziphandela abalakho konke lokhu.
Umnumzana Nhubu uthi okudingakalayo yikuba kuvuselelwe amabhizimusi abantu bethole imisebenzi.
Ingcwethi zenotho zithi uhulumende angavuselela amabhizimusi abantu bonke abatholakala besenza imisebenzi ezitaladeni labo bangabonakala bebuyela ukuyaqatshwa ukuze bethuthukise impilo zabo kulokuhlala begijinyiswa ngamapolisa behlukuluzwa bezama ukuphila.
Abantu abazisebenzayo laba ababhadali imithelo kuhulumende engaphathisa intuthuko yesizwe. Ibandla le Zanu PF kugwalo lwalo lwe Zimasset lithi lifisa ukuvula imisebenzi edlula izigidi ezimbili kusiya umnyaka ka2018 noma kungakabi khona okukhomba ukuba lokhu kungenzakala.