Inani labantwana abathi bezalwa bahle bafe selehlile kusukela kwabafika phose ikhulu-94 kwabayinkulungwane abazalwayo lafika kumatshumi ayisithupha lanhlanu-75 kutsho ucwaningo olwethulwe ngoLwesihlanu luhlangothi lwe ZIMSTAT lumanyene lenhlanganiso ye UNICEF.
Leli nani ngelabantwana abazalwe phakathi kweminyaka ka 2010 lo 2014. Ucwaningo lolu luthi ukwehla kwenani leli kubangelwe yizizatho ezinengi kodwa esikhulu ngesokwesulwa kwembadalo yabomama abazithweleyo lapho sebebeletha.
Umqondisi we ZIMSTAT uMnu. Mutasa Dzinotizei uthi inombolo lezi zibaphathisa ukulandela izinqumo ze Millennium Development Goals (MDGs).
Ukucubungula lokhu kutshengise ukuthi ngomnyaka ka 2008 inani labantwana abafa bezalwa laqansa layafika phose kwabalikhulu.
Kodwa umgcinisihlalo wekhomidi ebona ngezempilakahle edale lephalamende, uNkosikazi Ruth Labode utshele iStudio Seven ukuthi lanxa kujabulisa ukuthi inani labantwana abafayo selehlile inani leli liphezulu nxa kuqathaniswa lamanye amazwe angomakhelwane.
