Ingcwethi zomkhathi zithi ukungaqakathekiswa kodaba lokuguquka komumo womkhathi zinhlangothi ezehlukeneyo zempilo eZimbabwe lanxa izibonelo zomonakalo lo ziziveza nsuku zonke, yisibonelo sokuthi nxa kungasathathwanga amanyathelo ngokutshetsha ukusabalalisa ulwazi lemfundiso kunhlangothi zonke okubalisa intathelizindaba lumonakalo uzaqela ngamandla ufike kusibanga sokungalungiseki.
Emhlanganweni lentathelizindaba oqoqwe ngabenhlanganiso ye Coalition for Market and Liberal Solutions ( COMALISO ), bemanyene leye Konrad Adenauer Foundation ( KAF ), owenzelwe eweteleni ye Bronte eHarare, ngoLwesine, lezi ngcwethi zeScience, zithi zikubone kuqakathekile ukusebenzelana lentathelizindaba ekusabalaleliseni imibiko ephathisa uzulu ukuzwisisa phezu kokuphazamiseka komumo womkhathi ngenxa yokonakala kwe Ozone Layer.
Ukuguquka komkhathi kuphazamisa inhlangothi ezinengi zempilo ngakho kumqoka ukuba intathelizindaba zikhuthalele ukubhala indaba ezibonisa lokho, lezingcwethi zisithi kungafezeka lokho kuphela nxa lazo ziluzwisisa loludaba zingakalobi.
Enye yalezingcwethi esebenza kuhlangothi lokucubungula ezokuguquka komkhathi ngaphansi kogatsha olubona ngezokulondolozwa kwemvelo, amanzi lokuguquka komkhathi, umnumzana Elisha Moyo, uthi kungaphathisa kakhulu nxa lungakhulunywa sikhathi sonke loludaba, okuzaphathisa uhulumende ekuthini inkokheli kuhulumende ziluqakathekise.
Lokhu kuzaphathisa ukuthi umuntu wonke akubone ukuqaaktheka kokudinga ezinye indlela ezingasetshenziswa ukunqoba umonakalo osulethwa yikuguquka komkhathi, okufana lokulima ngendlela yokuthelezela kulokulindela izulu lona eselingasani ngendlela ngenxa yokuphazamiseka komumo womkhathi kuveza uMoyo.
Okhokhela inhlanganiso ebona ngezokucubungula yeCOMALISO, umnumzana Rejoice Ngwenya, uthi kungalesi sizatho bekubone kufanele babonisane lentathelizindaba emhlanganweni walamuhla, ukuqakatheka kokulotshwa ngezokuguquka komkhathi.
Lokhu kukhangelelwe njalo ukuphathisa uhulumende ukuba ahlele inhlelo zakhe, enanzelela udubo ilizwe elibhekane lalo, zilotshwe indaba ngobuciko obukhulu lapho ilizwe selikusibanga sokulungiselela ukuyangena umhlangano omkhulu we COP 21 eParis, kwele France.
Umhlangano wezokuguquka komkhathi wakwele France, owe Conference Parties,21st session - COP21uzabuthanisa inkokheli lengcwethi zomkhathi lolwazi lweScience zemazweni womhlaba, kusukela ekupheleni kwayonale inyanga kaLwezi, kubonisanwa ukuba kungenziwani ukunqoba inhlupho ezidalwa yikuguquka komkhathi, lokuba kuyini okungenziwa ukuvimba ukusabalala kwalumonakalo nxa usuthe waqala.