WASHINGTON DC — IZimbabwe Revenue Authority (ZIMRA) ebuthanisa imali yemithelo ithi yenelisile ukwedlulisa kancane isilinganiso semali ekade ikhangelelwe ukutholakala ngomnyaka ophelileyo.
IZIMRA ithi imali ebuthanisiweyo yemithelo ibe ngamabillion edlula kancane amathathu amadollar - $3.3 billion loba nje bekukhangelelwe ukuthi kuzatholakala i$3.2 billion.
Umnu. Sternford Moyo umqondisi we board ye ZIMRA uthi okwenze bathole imali ethe xaxa yikuthi babe lenhlelo ezibalulekileyo zokubuthanisa imithelo.
Imithelo ye-value added tax yiyo elethele uhlangothi lolu imali enengi ilandelwa yimithelo evela kuzulu lakumankampani. Umsebenzi wezemigodi ukhanya ulethele iZIMRA imali eyingcosana.
Umnu. Rejoice Ngwenya ingcwethi kwezenotho uthi iZIMRA yenelise ukwenza okuyimadlana lokhu njengoba umnotho welizwe uthuthuka kancane.