amalinks wokungena

Breaking News

Inhlangothi Zokwethulwa Kwezindaba Kumele Zisebenze Ndawonye


Inhlanganiso yeFAMWZ
Inhlanganiso yeFAMWZ

Abafundisa intathelizindaba ezikolo zemfundo yaphezulu emakolitshini lasemaUniversity, amankampani ethula izindaba kanye lenhlanganiso ezilwela ilungelo lentathelizindaba, bayavuma ukuba kukhona okungahlanganiyo okumele kulungisiswe phakathi kwenhlangothi ezintathu lezi kundlela ezisebenza ngayo.

Inhlangothi zontathu zithi sesifikile isikhathi sokuba zisebenzele ndawonye, zibonisana phezu kokungaphathisa ukuthuthukisa uhlangothi lokwethulwa kwezindaba elizweni, ibekhona inguquko ngomnyaka ka 2015, hatshi ukutshona zijikijelana ngamatshe njengalokho okuyikho khona okwamanje.

Linkuthazo iza ngemva kokuba sekubonakele ukuba ngempela zikhona izikhexe phakathi kwalezinhlangothi zontathu osekubangele ukulotshwa kwezindaba ezingalolongekanga kuhle ngoba omazibhala bengazange balolongwa ngendlela njengalokho okufiswa nguzulu.

Emhlanganweni lenhlangothi zonke eziphatheke kwezokukhitshwa kwezindaba, oqoqwe ngabenhlanganiso ye Federation of African Media Women – FAMWZ, bekujikijelanwa ngamatshe, kukhonjwana ngeminwe kubekanwa umlandu wokuba loluhlangothi yilo olusilelayo, olunye lalo lusithi oluthize yilo olungenzi kuhle.

Abanye babahleli bezindaba abekade bekulomhlangano bebekhala ngoluhlu lwabaphutsha izifundo zabo ezikolo zemfundo yaphezulu lase makolitshini.

Kodwa abanye bababalisi abaphatha umsebenzi wokuzilolonga lezintathelizindaba kulezi zikolo zemfundo yaphezulu bathi lanxa sebakunanzelela lokho okutshiwo ngabahleli bezindaba labenhlanganiso ezizimeleyo, bathi umlandu usekuthini kuyakhulunywa nje engekho ozimiseleyo ukudinga ndlela zokuwulungisisa lowo mumo.

Bathi sikhona isidingo sokuba kuhlalwe phansi, kubonisanwe lapho kuphosiswa khona, kulungisiswe okumele kulungisiswe, isimo siguquke kuveza omunye walaba babalisi umnumzana Thabani Mpofu, ofundisa izifundi kuhlangothi lwe Media ekolitshini le National University of Science and Technology – NUST.

Uthi uMpofu akusizi lutho ukube lokhe kukhombanwa ngeminwe, kukhulunywa nje endaweni yokudinga indlela yokukulungisisa lokho, kuphathise ukuletha leyo nguquko elangathelelwa nguzulu.

UMpofu uthi akukho ngenye indlela ngaphandle kokuba bancedisane abenhlangothi zontathu lezi, basebenzelane, ngaphandle kwalokho akaboni isiba khona inguquko ekhangelelwe nguzulu kuwonalo umnyaka ka 2015.

Inhlangothi zontathu zivumelana ukuba kumele kudonswe kanye kanye kusetshenzwe ukuthuthukisa ezezindaba elizweni ngoba zimqoka kuntuthuko yelizwe hatshi ukube lokhe kujikelanwa amatshe kubhadanwa ngodaka ikanti engekho omsulwa kulenkinga.

XS
SM
MD
LG