Intathelizindaba yeStudio 7 ixoxe lezinye zezizalwane zaseZimbabwe ezihlala edolobheni lako Bulawayo idingisisa ukuba kambe uzulu uphila mpilo bani phakathi kobunzima abhekane labo obukhulu kangaka.
USitshengisiwe Siwela yintombazana eleminyaka elitshumi lathobaminwe mbili (18). Yena uthi ngokwehluleka ukuphuma kuhle kuzifundo zika Form 4 nyakenye waqala ukwenza izifundo ze First Aid lenhlanganiso ye Red Cross.
Lokhu ukwenze ngoba elomzawakhe owayengapasanga kuhle esikolo kodwa wasesenza izifundo ezifanayo wazitholela umsebenzi kwesinye sezibhedlela esizimele sodwa esitholakala edolobheni lako Bulawayo.
Intombi yako Siwela layo kulezinsuku iyabamba bamba kwesinye sezibhedlela ezibelethisa omama abazithweleyo kodwa idlela evalweni ngoba lokhu kusayigxenye yezifundo zakhe akukacaci loba engaqeda ukufunda uzaqhatshwa na.
Inengi labantu eZimbabwe kaliqhatshwanga njalo lalabo abaqhatshiweyo kabahlalisekanga kulezinsuku ngoba amankampani exotsha abantu kalula nje.
Lesisimo sehlele uNompilo Gumede yena othi esikolo akade efundisa khona bathe usephelelwe ngumsebenzi ngoba engafundelanga lumsebenzi.
UNompilo ufunde enyuvesi elizweni le South Africa ikanti omunye ofunde khonale uBongani Zoza uthi lakhonale isimo siyala sisiba nzima yikho kwele Zimbabwe kuzamele kube lobukhokheli obutsha ukuze kuvuleke amathuba emisebenzi.
Ngesikhathi ilizwe lingakamotshakali ukufunda bekusenza umuntu ofundileyo ekhombe ngophakathi kodwa uTrevor Sibanda uthi ofundileyo longafundanga sekufana nje kwele Zimbabwe.
Inengi lezizalwane ze Zimbabwe zikhalela ukuba ngabe ziyathola imisebenzi kodwa uJaphet Mntungwazi uthi ukuqhatshwa akusiyo mpendulo ngoba yena udonsa nzima loba nje eqhatshiwe.
Akekho okwaziyo ukuba ikusasa yelizwe le Zimbabwe imi njani kodwa izifiso zabantu abanengi zisekutheni aluba isimo somnotho siyathuthuka bethole imisebenzi ukuze benelise ukuselela imuli zabo.