amalinks wokungena

Breaking News

Inkampani yeWilsgrove Iphathisa Amaqembu eDivision 2 le 3


Amaqembu omdlalo wenguqu adlala kuzigaba zangaphansi, eze Division 2 le 3, edolobheni lako Bulawayo asethole inkuthazo yokuphutsha imidlalo yalonyaka ephezu kwengalane ngemva kokufakwa kwamadola afika phose inkulungwane ezinhlanu yinkampani ye Willsgrove Farm.

Amaqembu azaqeda imidlalo yawo ephezu kwengalane kusigaba se Division 2 lakusigaba se Division 3 lonyaka edolobheni lako Bulawayo azathi phezu kokuthola ilungelo lokuyadlala kusigaba esiphezu kwaleso abedlala kuso aphinde njalo athole umvuzo wemali ngemva kokuba inkampani ye Willsgrove iphe inhlanganiso ye Zifa imali engange $4 800.

Limali izabelwa amaqembu azaphutsha imidlalo yeligi ephezu kwengalane njalo lokhu kuza ngemva kweminyaka eminengi amaqembu adlala kuzigaba zangaphansi edlalela amahala loba nje wona ebhadala imali eyokubhalisa ekuqaleni komnyaka kunhlanganiso yeZifa.

Ekhuluma emkhosini wokuphawula lolu sekelo lwemali oluvela kwabe Willsgrove umsekeli kaMongameli wenhlanganiso ye Zifa uOmega Sibanda ukhuthaze ukuba amankampani asebenzisane labasacathulayo emdlalweni wenguqu.

Isikhulumeli senkampani ye Willsgrove uP Chakabuda uvumelane lo Sibanda wathi ingqubelaphambili yezemidlalo izavela nxa kungathuthukiswa imidlalo yabasakhulayo.

Uqhubekele phambili wathi usekelo lwabo alusilo lwalonyaka kuphela kodwa seluzaba yinhlalayenza.

Akusavezwanga obala ukuba imivuzo yemali izabe imi njani kodwa amaqembu amabili aphuma kusigaba ngasinye azaqeda imidlalo yawo elokuziphatha azathola amakhulu amabili amadola ngalinye ivela kumnikazi wenkampani ye Willsgrove njalo leyomali iyabe ingasiyo ngxenye ye $4 800 kodwa iphuma esambeni sakhe.

Umgcinisihlalo wesigaba seSouthern Region uMusa Mandaza ubonge kakhulu abe Willsgrove wakhuthaza ukuba amaqembu abe lobudlelwano obujulileyo lenkampani le.

Amaqembu amane ahlezi phezu kwengalane ngemva kwemidlalo elitshumi lathoba munwe munye kusigaba sika Division 2 ngathi i BCC Golden Lions, iCasmyn, iAjax Hotspurs kanye le Magwegwe Pirates.

Kusigaba sika Division 3 amaqembu akhokhelayo ngemva kwemidlalo elitshumi lathoba munwe munye ngathi iToronto, iTalen Vision, iLG Vultures kanye le EM Sports.

XS
SM
MD
LG