Inkosi uGoodwill Zwelithini yaKwazulu kweleSouth Africa, isiphike yemba phansi ukuthi yiyo eyethula inkulumo ebangele ukuthi kuhlaselwe abakwamanye amazwe. Inkosi isixwayise bonke abahlasela abakwamanye amazwe ukuthi bayekele lowo mkhuba ngoba kuyinto embi, yaphinda njalo yathumela izinduna zayo ukuthi ziye emphakathini ziyekwenqabela ukuhlaselwa kwabakwamanye amazwe.
Ekhuluma kuzwelonke ngoMvulo emhlanganweni wezinduna, amakhosi, amabutho, iziphathamandla zikahulumende lezakhamizini zesabelo sakwaZulu Natal, iNkosi uGoodwill Zwelithini uthe ukhathazekile kakhulu ngokuthi kukhona asebegcona igama lakhe besithi inkulumo yakhe yiyo eyabangela ukuhlaselwa kwabakwamanye amazwe.
Inkosi ithi kayizange ike ikhuthaze ukuhlaselwa kwabantu bakwamanye amazwe kweleSouth Africa yethesa abezindaba umlandu wokwethula imbiko engasiqiniso ngalokhu ayekutsho.
Inkosi uZwelithini kayiphozisanga maseko yahle yethula inkuthazo yokuthi bonke abaphatheke ekuhlaselweni kwabantu bakwamanye amazwe bakele lowo mkhuba ngokuphangisa. Inkosi ihle yathumela izinduna zayo ukuthi ziye emphakathini ziyeqinisekisa ukuthi kakula sizalwane sakwamanye amazwe esethuselwayo, ukutshaywa loba ukubulawa.
Umkhokheli webandla le Inkatha Freedom Party elilabasekeli abanengi kwaZulu lapho okuqale khona ukuhlaselwa kwabakwamanye amazwe, umnumnzana Mangosuthu Buthelezi, laye ukubeke kwacaca ukuthi akekho olelungelo lokuhlasela yiloba ngubani oselizweni.
Lobanje inkuthazo yenkosi uZwelithini ifika sekubulewe abantu abayisikhombisa kwathi izinkulungwane zabakwamanye amazwe zabaleka emakhaya azo, isizalwane seZimbabwe umnumnzana Giyane Dube uthi bayemukela ngezandla zombili inkuthazo yoxolo lokuthula eyethulwe yinkosi uZwelithini.
Kusenjalo, limbiko iza ngesikhathi lapho ummeli weZimbabwe kweleSouth Africa umnumnzana Isaac Moyo etshele abezindaba ukuthi kulezizalwane zeZimbabwe ezingamakhulu ayisikhombisa ebesezingcinwe ezinkambeni zeziphepheli ngemva kokubalekela udlame endaweni ezitshiyeneyo eDurban, esezidingelwe amabhasi ukuthi aziphindisele ekhaya ngenxa yokwesabela impilo zazo.
Kunjalonje kubikwa kungela zehlakalo zokuhlaselwa kwabakwamanye amazwe ezibikiweyo ngoMvulo.
Kusenjalo, uMnu. Zenzo Nkomo, ingcwethi ecubungula ezombusazwe uthi udlakela oluqondiswe kwabavela kwamanye amazwe kweleSouth Africa lungehla ngenxa yenkuthazo evela kubakhokheli bezombusazwe labezomdabu.
