Ingcwethi kwezokwethulwa kwezindaba zezempilakahle utshele umhlangano lentathelizindaba eziloba ezempilakahle, ukuba kumqoka ukuthi zihloniphe kanye lokuzwisisa isiko lokholo lwamaqembu ehlukeneyo empilo ekulobeni izindaba ukuze ifezeke injongo yokuba izwisiseke imibiko eqondiswe kuzulu.
Lokhu ngokunye kokuphume emhlanganweni lentathelizindaba eziloba ngezempilakahle njalo zingamalunga enhlanganiso ye Health Journalists Association of Zimbabwe – HeJaz, wamalanga amabili oqoqwe ngokusebenzelana phakathi kogatsha lwezempilakahle labehofisi ebona ngezobudlelwano lozulu – Public Affairs, emahofini ommeli weMelika kuleli owenzelwe eweteleni ethiwa yi Pandhari.
Obengumhlonitshwa njalo enguye obetholisa lezintathelizindaba imfundiso phezu kokuloba indaba zezempilakahle ngendlela elohlonzi, u Proffessor Mahiuddin Haider utshele lezintathelizindaba ukuba kumqoka ukuhlonipha amasiko lenkolo zabanye ukuze afinyeleleke uzulu ngokugcweleyo.
Intathelizindaba ebezikulomhlangano ziveze ukujabula ngoba zithi ziphathisekile kakhulu ngolwazi eziluchathekelwe ngu sikhwhicamfundo Haider ofundisa kuhlangothi olubona ngezempilakahle kazulu – Public Health, esikolo semfundo yaphezulu se University ye Maryland – College Park kwele Melika.
Umnumzana Thabani Dube oyintathelizindaba eloba izimele ngomunye wabatshengise ukujabulela lezi zifundo ethi ngabe ziqhutshwa sikhathi sonke ukukhumbuza intathelizindava ukuqakatheka kokuloba indaba ezilohlonzi eziphathisa kuntuthuko yelizwe lenhlalakahle kazulu.
Ngaphambilini kuqhutshwe njalo umhlangano wamalanga amabili njalo wokuphathisana labohlangothi olubona ngezokukhulumisana kugatsha lwezempilakahle ukuze buqiniswe ubudlelwano phakathi kwabo lentathelizindaba okuzaphathisa ekulotshweni kwalezo ndaba ngoba belutholiswa ulwazi ngesikhathgi labo okumele balobele uzulu okuyimizamo enconywe njalo ngumnumzana Dube.
Abohlangothi olubona ngezobudlelwano lozulu – Public Affairs kanye labogatsha lukahulumende bathi bakubone kufanele ukurhi baqhube lumhlangano lentathelizindaba eziloba ngezempilakahle ngaphansi kwenhlanganiso ye HEJAZ emizameni yokuthuthukisa lokulolonga indlela eziloba ngayo lezo ndaba ukuze zikhwabithwe nguzulu.
Omabili amaqembu la avumelene ukuba nxa zingalotshwa ngendlela ezwisiseka nguzulu lezondaba zezempilakahle, kuphathisa ekuthini sithuthuke isizwe uzulu aguqule imibono yakhe phezu kwezinye inkinga kwezempilakahle amukele lokho akucetshiswayo.