amalinks wokungena

Breaking News

Intengo Yempahla Yehlile Kancane eZimbabwe NgoNkwenkwezi: CCZ


Inhlanganiso ebona ngelungelo labathengi eye Consumer Council of Zimbabwe (CCZ), ithi intengo yenyama, amafutha okupheka lokunye yehlile ngenyanga ephelileyo.

Unkosazana Rosemary Siyachitema umqondisi we CCZ utshele iStudio 7 ngoLwesine ukuthi lokhu kubangele ukwehla kwemali edingeka ukuphilisa imuli elabantu abayisithupha abasemadholobheni ngenyanga.

Imali le yehle isuka kumadollar edlula amakhulu amahlanu lamatshumi ayisithupha lasitshiya galolunye– $568 ngoMabasa, yafika kumakhulu amahlanu lamatshumi ayisithupha amadollar - $560.

Uthe ngaphandle kwenyama lamafutha okupheka, kwehle intengo ye rice, amahlamvu etiye, ikhabitshi, amatamatisi le hanyanisi.

Umnu. Thulani Ndaba ohlala elokitshini le Pelandaba koBulawayo uthi kuyamangalisa okukhulunywa yi Consumer Council.

Kodwa-ke uMnu. Sikhumbuzo Mangena isakhamuzi seGweru uthi intengo yempahla iqonge okwamagama kulelidolobho ngenyanga ephelileyo.

Inhlanganiso ye CCZ iphinde yathi inkampani ye South Africa eyehlolisisa ukudlelana kukazulu lamabhanga kwele Zimbabwe ifumane ukuthi abantu makhaza abayisilinganiso sokungamatshumi amathathu lokuyisithupha ekhulwini – 36% badla kabili kuphela ngelanga ngenxa yokuswela imali.

Ukuhlolisisa lokhu okubizwa ngokuthi yi FinScope Consumer Survey Zimbabwe 2011, kutshengise njalo ukuthi inengi labantu kalisafaki imali emabhanga.



XS
SM
MD
LG